Илон Маскнинг The Boring Company компанияси Vegas Loop тармоғининг ер ости туннелини тақдим этди. Премьера Лас-Вегасдаги International Consumer Electronics Show’да (CES 2022) бўлиб ўтди.

Узунлиги 2,7 километр бўлган туннель Лас-Вегаснинг икки қисмини боғлайди. Бу Маскнинг компанияси кейинги бир неча йил ичида қурадиган ер ости туннель тармоғининг бир қисми бўлади.

Tesla раҳбарининг режасига кўра, шаҳарни тирбандликдан халос қилиши керак бўлган Vegas Loop’да премьера вақтида электромобиль воситаларининг тирбандлиги юзага келган. Ижтимоий тармоқларда туннелда тирбандлик акс этган видео тарқалди.

Маълумот учун, The Boring Company 2019 йилда Лас-Вегасда туннель қуриш учун 48,7 миллион долларлик шартномани қўлга киритганди. Қурилиш 2020 йилнинг охирида якунланиши керак эди. Бироқ бошланиб қолган пандемия ва карантин чекловлари лойиҳа амалга ошишини кечиктирди.

Аввалроқ америкалик бизнесмен Илон Маскнинг бойлиги иккинчи марта 300 миллиард доллардан ошгани хабар қилинганди.