Lamborghini келгуси йилдан бензинда юрадиган автомобиллар ишлаб чиқаришни тўхтатади. Компания ўзининг биринчи плагинли гибридини 2023 йилда тақдим этади. Трансформация учун рекорд даражадаги 1,5 миллиард евро ажратилган. Бу ҳақда Bloomberg Lamborghini раҳбари Стефан Винкельманга таяниб хабар берди.

Қайд этилишича, 2024 йилда компания барча моделларни электромобиль сифатида ишлаб чиқаришга ўтади. 2025 йилдан эса Lamborghini аккумуляторда юрадиган машина ишлаб чиқаришни бошлайди.

Lamborghini ҳали ҳам ўзининг биринчи электромобилининг якуний дизайни устида ишламоқда ва кундалик фойдаланиш учун мос бўлган тўрт эшикли моделга айлантирмоқда.

Компания раҳбарининг сўзларига кўра, автоконцерн электромобиллар ва гибридлар ишлаб чиқаришга ўтиш учун рекорд даражадаги 1,5 миллиард евро ажратган.

Маълумот учун, Lamborghini 1963 йилда Италияда ташкил этилган. Компания ҳозирда Audi AG шўба корхонаси орқали Volkswagen Group гуруҳига тегишли.

Аввалроқ Ўзбекистонда электромобиль ишлаб чиқариш рағбатлантирилиши хабар қилинганди.