Марказий банк томонидан ишлаб чиқарувчиларга 2021 йилнинг I ярим йиллигида 30,7 триллион сўм, II ярим йиллигида 32,3 триллион сўм — жами 63 триллион сўмлик тўловлар амалга оширилди. Бу ҳақда «2021 йилнинг II ярим йиллиги учун банк тизими ликвидлиги шарҳи»да сўз боради.

Қайд этилишича, олтин нархининг биринчи ярим йилликка нисбатан бироз юқори бўлиши, ўз навбатида, Марказий банкнинг қимматбаҳо металл ишлаб чиқарувчиларга тўловларининг ҳам ошишига сабаб бўлган.

Маълум бўлишича, 2021 йилнинг II ярим йиллигида жаҳонда иқтисодий фаолликнинг тикланиши ҳисобига нефть ва молиявий активлар нархининг ўсиши ҳамда аксарият давлатларда инфляцион жараёнларнинг тезлашиши фонида жаҳон бозорида олтин нархи 1 троя унция учун 1750-1800 доллар атрофида шаклланган.

Шунингдек, қимматбаҳо металларни харид қилиш ҳисобига шаклланган мазкур қўшимча ликвидлик ички валюта бозорига «олтин-валюта захиралари нейтраллиги тамойили»га асосан интервенциялар орқали стерилизация қилиб борилган.

«Жумладан, 2021 йилда Марказий банкнинг ички валюта бозорига соф интервенциялари 6,7 миллиард долларни (71,6 триллион сўм эквиваленти) ташкил этиб, қимматбаҳо металл хариди натижасида юзага келган қўшимча ликвидликнинг тўлиқ ҳажмда стерилизация қилиш имконини берди», дейилади шарҳда.

Ëзилишича, банк тизимига чиқарилган қўшимча ликвидликнинг деярли тўлиқ ҳажмда стерилизация қилинишини инфляцияга босим кўрсатиши мумкин бўлган монетар омиллар таъсирини минималлаштириш имконини беради.

Аввалроқ Ўзбекистон ноябрь ойида дунё бўйича энг кўп олтин сотган давлат бўлгани ҳақида хабар берилганди.