Илон Маскнинг Neuralink компанияси ҳайвонларга нисбатан шафқатсиз муносабатда бўлгани ҳақидаги айбловларни рад этди. Бу ҳақда Forbes хабар берди.

Маълум қилинишича, миллиардер Илон Маскнинг неврологик касалликларни даволаш учун мияга имплантация қилинадиган чипларни ишлаб чиқарувчи Neuralink компанияси тажрибалар давомида ҳайвонларга нисбатан шафқатсиз муносабатда бўлгани ҳақидаги айбловларни рад этган.

«Ҳозирда барча янги тиббий асбоблар ва даволаш воситалари одамларда ахлоқий жиҳатдан синовдан ўтказилишидан олдин ҳайвонларда синовдан ўтказилиши керак. Neuralink эса бу борада ягона эмас», дейилади компания баёнотида.

Аввалроқ, тиббий тадқиқотларда ҳайвонлардан фойдаланишга қарши бўлган АҚШнинг Масъулиятли тиббиёт бўйича шифокорлар қўмитаси АҚШ Қишлоқ хўжалиги вазирлигига Neuralink ва федерал приматлар тадқиқот марказини бошқарадиган Девисдаги Калифорния университети устидан шикоят қилганди.

Ташкилот Маск компанияси ва университетни Ҳайвонларни ҳимоя қилиш тўғрисидаги қонунни бузганликда айблаган. У ўз шикоятида «23 та маймун устида ўтказилган ўлимга олиб келувчи мия тажрибалари» ҳақида хабар берган. Ҳайвонлар фаолларининг таъкидлашича, макакалар якка-якка қафасларда сақланган, бош суягига пўлат штирлар қоқилган, миялари ишлатилган моддалар таъсирида вайрон қилинган ва кўпинча уларни тажрибадан олдин ҳам ўлдириб қўйган.

Шунингдек, қўмита Калифорниядаги Йоло округи судига университетни тадқиқот учун фойдаланилган маймунларнинг видео ва фотосуратларини чиқаришга мажбурлаш учун даъво аризаси билан чиққан.

«Ҳужжатлар шуни кўрсатадики, маймунларнинг миялари сифатсиз тажрибаларда шикастланган ва азоб чекиб, ўлишга қолдирилган. Нега Илон Маск ва университет ушбу даҳшатли зўравонлик акс этган фотосуратлар ва видеоларни оммадан яширишни хоҳлаётгани тушунарли», — дея қайд этган ҳайвонлар ҳуқуқлари фаоллари.

Neuralink саккизта ҳайвон эвтаназия қилинганини тан олган: иккита маймун гистологик маълумотларни йиғиш учун эвтаназия қилинган ва олтитаси ветеринарларнинг хатоси сабабли. Хусусан, бир ҳолатда регулятор томонидан тасдиқланган био-елимдан фойдаланилгач, ҳайвоннинг ҳолати ёмонлашган; қурилма бир марта ишламай қолган ва тўрт марта имплант инфекцияга сабаб бўлган.

Маскнинг компанияси, ўз навбатида, ҳайвонлар билан барча ишлар қонун ҳужжатларига мувофиқ амалга оширилиши, тиббий ва операциядан кейинги ёрдам эса фидойи ва малакали ветеринария ходимлари томонидан кўрсатилишини таъкидлаган.

Neuralink 2016 йилда ташкил этилган бўлиб, у мия ва орқа мия жароҳатлари оқибатларини бартараф этиш учун имплантация қилинадиган чипни ишлаб чиқмоқда. 2021 йилнинг 1 февралида Маск маймуннинг миясига чип муваффақиятли ўрнатилгани ҳақида эълон қилиб, маймун «бахтли» эканини ва «дунёдаги энг яхши маймун хонаси»да яшашини таъкидлаган. 2022 йил январь ойида Neuralink имплантларни инсонда клиник синовлардан ўтказиш учун директор қидира бошлаган.

Аввалроқ Илон Маск Tesla’нинг 5,7 миллиард долларлик акцияларини хайрия қилгани ҳақида хабар берилганди. Шунингдек, Илон Маск космосни монополиялаш ҳақидаги айбловларга жавоб қайтаргани хабар қилинди.