Тошкент шаҳрида жойлашган Нефть ва газ конлари геологияси ҳамда қидируви институти биноси аукционга қўйилгани ҳақида хабар берилганди. Бино 44 миллиард 375 миллион 700минг 759 сўмга сотилди.

Маълум қилинишича, аукционда «BIG TRIP SERVICE» МЧЖ ғолиб бўлган. Бинонинг бошланғич нархи 43 миллиард 505 миллион 588 минг 980 сўм этиб белгиланганди.

Вазирлар Маҳкамасининг 2021 йил 20 майдаги тегишли қарори бинони хусусийлаштириш учун асос қилиб олинган. Ер участкасининг эгаллаган умумий майдони 0,82 гектарни ташкил этади.

Давлат объектининг олди-сотди шартномаси аукцион савдолари ўтказилган кундан кейин, 10 кун муддат ичида, сотувчи, балансда сақловчи ва аукцион савдоларининг ғолиби ўртасида олди-сотди шартномаси расмийлаштирилмаса, автоматик тарзда ғолибдан кейинги иштирокчига тасдиқлаган нархи бўйича мазкур объект бўйича олди-сотди шартномасини тузиш таклифи берилади. Бундай ғолиб мавжуд бўлмаганда такрорий аукцион савдоларига чиқарилади.