Ўзбекистонда 25 дан ортиқ фаолият тури бўйича монополиялар тугатилади
Янги Ўзбекистоннинг тараққиёт стратегияси ва уни «Инсон қадрини улуғлаш ва фаол маҳалла йили»да амалга оширишга оид давлат дастури тасдиқланган.
Ўзбекистонда 25 дан ортиқ фаолият тури бўйича монополиялар тугатилади. Бу ҳақда Адлия вазирлигининг Huquqiy axborot канали хабар берди.
Маълум қилинишича, Янги Ўзбекистоннинг тараққиёт стратегияси ва уни «Инсон қадрини улуғлаш ва фаол маҳалла йили»да амалга оширишга оид давлат дастури тасдиқланган.
Дастур доирасида, 2022 йилда инфляцияни 9 фоизгача ва 2023 йилда 5 фоиз ва фискал тақчилликни 3 фоизгача пасайтириш чоралари кўрилади. Шунингдек, 2026 йил якунигача банк активларида хусусий сектор улуши 60 фоизгача чиқарилади.
Шу билан бирга, 2023 йилдан қўшилган қиймат солиғи 12 фоизгача ва банк, молия ва телекоммуникация каби тадбиркорлик учун фойда солиғи 15 фоизгача туширилади.
Бундан ташқари, 2026 йилгача энергия самарадорлиги 20 фоизга оширилади ва ҳавога чиқариладиган зарарли газлар 10 фоизга қисқартирилади.
Шароити «оғир» бўлган ҳудудларда 2025 йил 1 январгача янги тадбиркорлар учун айланмадан олинадиган солиқ 1 фоиз, ер солиғи, мол-мулк солиғи ҳисобланган суммадан 1 фоиз ставкада тўлаш тизими жорий этилади.
Қайд этилишича, 2025 йил 1 июлдан тадбиркорликка оид барча мажбурий талаблар ягона электрон реестри ишга туширилади. 2022 йил 1 апрелгача эса лицензия ва бошқа рухсат этувчи ҳужжатларни олиш соддалаштирилади. Жумладан, муайян фаолият билан кўчма тартибда, автотранспорт орқали шуғулланиш имконияти яратилади.
Таъкидланишича, 25 дан ортиқ фаолият тури бўйича монополиялар (суюлтирилган газ етказиш, нефть маҳсулотларини сақлаш ва бошқалар) тугатилиши кўзда тутилган.
Аввалроқ Ўзбекистонда «Рақобат тўғрисида»ги ва «Табиий монополиялар тўғрисида»ги қонунлар бирлаштирилиши хабар қилинганди. Шунингдек, Ўзбекистонда 14 та фаолият тури бўйича монополияларни тугатиш режалаштирилгани ҳақида хабар берилди.
