Ўзбекистонда 2021 йилнинг 11 ойида қайд этилган иқтисодий фаоллик ва тармоқлардаги ижобий кўрсаткичларни ҳисобга олиб йил якунлари бўйича иқтисодий ўсиш суръати 6,5–7,2 фоиз атрофида бўлиши кутилмоқда. Бу ҳақда Марказий банкнинг асосий ставкани ўзгаришсиз қолдириши тўғрисидаги йиғилишда маълум қилинди.

Қайд этилишича, иқтисодиётнинг реал сектори корхоналари ўртасида ноябрь ойида ўтказилган сўров натижаларига кўра, иқтисодий фаоллик индекси бироз мавсумий пасайиш тенденциясига эга бўлса-да, ижобий даражада шаклланиб, 53,4 ташкил этган (ўртача йиллик 52,9).

Маълум бўлишича, 2021 йил иккинчи ярмидан бошлаб кенг кўламда амалга оширилаётган фискал рағбатлантиришлар ва пул-кредит сиёсатининг жорий шароитлари 2022 йилнинг биринчи ярмида ҳам истеъмол талаби ва инвестицион фаолликни қўллаб-қувватловчи асосий омиллардан бўлади.

Ҳисоб-китобларга кўра, 2022 йилнинг иккинчи ярмидан иқтисодий ўсиш суръатлар ўзининг узоқ муддатли кўрсаткичларига, иқтисодиёт эса ўз салоҳиятли даражасига яқинлашади. Шунингдек, кредитлаш фаоллигининг сақланиб қолиши натижасида январь-ноябрь ойларида иқтисодиётга ажратилган кредитлар ҳажми 2020 йилга нисбатан 31 фоизга ўсган бўлса, кредитларнинг қайтувчанлик даражаси 14 фоиз бандга яхшиланиб, 72 фоизга етган.

Аввалроқ Ўзбекистоннинг умумий давлат қарзи 2022 йилда қанчага етиши прогноз қилингани ҳақида хабар берилганди. Шунингдек, Ўзбекистонда 2022 йил ЯИМ 6 фоизга ўсиши ҳақидаги давлат бюджети лойиҳаси хабар қилинди.