«Ўзбектелеком» Швейцария банкидан 200 млн евро қарз олади
«Ўзбектелеком» ижроия органига кредит жалб этиш билан боғлиқ ҳужжатларни расмийлаштириш ҳуқуқи берилади.
«Ўзбектелеком» акциядорлик компанияси Credit Suisse банкининг Лондондаги филиалидан 200 миллион евро эквивалентида кредит олади. Бу ҳақда Молия вазирлигининг ягона корпоратив ахборот порталида маълумот берилди.
Қайд этилишича, компания ушбу маблағни Huawei Technologies иштирокидаги «‘Ўзбектелеком’нинг шарқий минтақадаги телекоммуникация инфратузилмасини янада ривожлантириш» лойиҳасини амалга оширишга сарфлайди.
«Ўзбектелеком» ижроия органига кредит жалб этиш билан боғлиқ ҳужжатларни расмийлаштириш ҳуқуқи берилади.
Шунингдек, орган режалаштирилган лойиҳаларни амалга ошириш учун жалб этилаётган кредитни мақсадли ишлатилишни таъминлайди.
Аввалроқ Президент Шавкат Мирзиёев Ўзбекистондаги 118 та олис қишлоққа алоқа тизими ва интернет умуман етиб бормаганини маълум қилганди.
Шунингдек, давлат раҳбари «Ўзбектелеком»нинг даромадлари ва самарадорлиги бошқа мамлакатлар коммуникация компанияларидан анча пастлигини айтганди.
Интернет ва Ўзбекистон
Маълумот учун, Ўзбекистонда интернет фойдаланувчилари сони 27 миллиондан ошган, шундан 25 миллиондан кўпи мобил интернет фойдаланувчилари ҳисобланади.
Ахборот технологиялари ва коммуникацияларини ривожлантириш вазирлигининг вакилининг сўзларига кўра, 95 фоиз аҳоли масканлари мобил интернет билан қамраб олинган, 54 фоиз уй хўжаликларида юқори тезликдаги интернетга уланиш имкони яратилган.
Оператор ва провайдерларга Интернет хизматлари учун тариф 2021 йилнинг январига нисбатан 2022 йил бошида 42,9 фоизга арзонлаштирилиб, 1 Мегабит/секунд 30 минг сўмни ташкил этмоқда.