Қозоғистон Энергетика вазирлиги электр энергияси тақчиллиги эҳтимолини ҳисобга олган ҳолда республикада атом электр станцияси (АЭС) қурилишини истиқболли деб ҳисоблайди. Бу ҳақда 14 февраль куни бўлиб ўтган брифингда Қозоғистон энергетика вазири Болат Акчулаков маълум қилди.

«Электр энергетикаси соҳасида бўлажак тақчилликни ҳисобга олган ҳолда, глобал экологик кун тартиби, шунингдек, қабул қилинган дастур — углерод нейтраллигига ўтиш декларацияси туфайли кўмир ишлаб чиқаришга боғлиқликни камайтириш керак. Шу билан бирга, мамлакатимизда ишлаб чиқариш қувватларининг пасайиб бораётгани ва атом энергетикасини ривожлантириш учун улкан салоҳият мавжудлигини ҳисобга олсак, атом электр станцияларини қуриш энг тўғри ечим бўлиб кўринади», — деган Акчулаков.

Қайд этилишича, 2019 йилда Россия Президенти Владимир Путин ва Қозоғистон Президенти ўртасида бўлиб ўтган учрашувда Россиянинг Қозоғистонда атом электр станцияси қуриши масаласи биринчи марта кўтарилганди. Россия раҳбари Тўқаевга Россия лойиҳаси бўйича Қозоғистонда АЭС қуришни таклиф қилган.

Бундан ташқари, 2021 йил декабрь ойи охирида Қозоғистон Энергетика вазирлиги раҳбари Мағзум Мирзагалиев республика ҳукумати АЭС қурилиши мумкин бўлган иккита географик нуқта — Олмаотадаги Улкен қишлоғи ва Шарқий Қозоғистон вилоятининг Курчатов шаҳрини кўриб чиқаётганини айтган.

Шу билан бирга, у жойлашувни танлаш бўйича якуний қарор ҳали қабул қилинмаганини таъкидлаган. Февраль ойи бошида Акчулаков Қозоғистонда атом электр станциясини қуриш бўйича ҳозирча аниқ қарор йўқлигини айтганди.

Аввалроқ Қозоғистон Президенти мамлакатга тоза атом энергияси ниҳоятда зарурлигини айтгани хабар қилинганди. Шунингдек, Қозоғистон Хитойдан келаётган криптомайнерлар туфайли АЭС қуриши мумкинлиги ҳақида хабар берилди.