Ўзбекистонда ҚҚС тўловчининг офис майдони 18 метр/квадратдан кам бўлмаслиги талаб этилади. Бу ҳақда Давлат солиқ хизматининг матбуот хизмати хабар берди.

Маълум қилинишича, Вазирлар Маҳкамасининг қарори билан тасдиқланган низомга мувофиқ, ҚҚС тўловчиларни солиқ органларида махсус рўйхатдан ўтказишда солиқ хавфи даражасини аниқлаш мақсадида солиқ органлари уларнинг жойлашган жойи манзилини ўрганишга ҳақли.

Бунда мулк ҳуқуқи ёки ижара ёхуд текин фойдаланиш асосида битта юридик шахсга ўртача 18 метр/квадратдан кам маъмурий мақсадларда фойдаланаётган майдон (офис) тўғри келса номинал манзил деб эътироф этилади.

Қайд этилишича, Ўзбекистонда ўрнатилган шаҳарсозлик меъёрларига мувофиқ ишчи хоналар ва кабинетлар 1 штат ходимига камида 6 метр/квадрат майдон тўғри келиши ҳисобидан лойиҳаланади.

Юридик шахснинг раҳбари камида 3 нафар ходимга эга бўлиши ҳисобга олинса, биноларнинг (офис) минимал майдони 18 метр/квадратни ташкил қилади.

Ушбу меъёр реал иқтисодий фаолиятни амалга оширмайдиган субъектларни (хусусан, бир вақтнинг ўзида бир нечта юридик шахс «оммавий рўйхатга олиш» манзилида рўйхатдан ўтганлигини) аниқлаш мақсадида ўрнатилган.

Таъкидланишича, бугунги кунда 149 минг 371 та ҚҚС тўловчининг:

• 99,5 фоизи ушбу мезонга тушмайди;
• 0,5 фоизи (742 та субъект) заруратдан кам майдонга эга.

Вазирлар Маҳкамасининг 2021 йил 22 сентябрдаги қарорида назарда тутилган мезонлар фақат ҚҚС тўловчиларини хавф гуруҳларига ажратиш учун қўлланилади ва ҚҚС тўловчиси ҳисобланмайдиган якка тартибдаги тадбиркорлар, ўзини ўзи банд қилганлар, оилавий корхоналар ва юридик шахсларга қўлланилмайди.

Бунда, ушбу мезонлар тадбиркорлик фаолиятини тақиқлаш учун асос бўлмайди, балки фақат ҚҚС тўловчиси мақомига мувофиқлик кўрсаткичи бўлиб хизмат қилади.

Аввалроқ Ўзбекистонда 2022 йил учун ҚҚС даромадлари прогноз қилингани ҳақида хабар берилганди. Шунингдек, Ўзбекистонда 2023 йилдан ҚҚС 12 фоизгача пасайтирилиши хабар қилинди.