Шавкат Мирзиёев Ислом тараққиёт банки президентини қабул қилди
Шавкат Мирзиёев Саудия Арабистонига давлат ташрифи доирасида Ислом тараққиёт банки президенти Муҳаммад бин Сулаймон Ал-Жассирни қабул қилди. Учрашувда томонлар транспорт инфратузилмаси бўйича минтақавий лойиҳалар ва Оролбўйида экологик дастурларни амалга ошириш борасидаги ҳамкорлик юзасидан фикр алмашди.
Шавкат Мирзиёев 18 август куни Саудия Арабистонига давлат ташрифи доирасида Ислом тараққиёт банки президенти Муҳаммад бин Сулаймон Ал-Жассирни қабул қилди. Бу ҳақда президент матбуот хизмати хабар берди.
Маълум бўлишича, давлат раҳбари ИТБ президентини Тошкент шаҳрида Банк Бошқарувчилар кенгашининг 46-йиллик йиғилиши муваффақиятли ўтказилгани билан яна бир бор табриклаган. Қайд этилишича, ҳозирда ИТБ билан биргаликда уй-жой коммунал инфратузилмани модернизация қилиш, қишлоқларни, соғлиқни сақлаш, таълим, сув хўжалиги, тадбиркорлик ва бошқа соҳаларни ривожлантириш бўйича умумий қиймати 1,2 миллиард долларлик лойиҳалар амалга оширилмоқда.
Музокараларда ҳамкорликни янада кенгайтириш масалалари муҳокама қилинган. 2022 йил якунигача Банк томонидан 1,6 миллиард долларлик лойиҳа ва дастурларни молиялаштиришни маъқуллаш назарда тутилган алоҳида дастур қабул қилинган. Шунингдек, учрашувда Банкнинг Тошкентдаги тўлақонли ваколатхонасини тез фурсатда ташкил этиш, янги молиялаштириш воситаларини жорий қилиш муҳим экани таъкидланган.
Бундан ташқари, томонлар транспорт инфратузилмаси бўйича минтақавий лойиҳаларни, Оролбўйида экологик дастурларни амалга ошириш борасидаги ҳамкорлик, шунингдек, ИҲТнинг алоҳида траст фонди кўмагида Афғонистонга гуманитар ёрдам кўрсатиш ва уни ижтимоий-иқтисодий тиклаш масалалари юзасидан фикр алмашган. Банк бошчилигидаги ислом оламининг етакчи молиявий институтларини ўз ичига олган Араб мувофиқлаштириш гуруҳининг навбатдаги йиғилишини Тошкент шаҳрида ўтказиш муддатларини кўриб чиқиш юзасидан келишувга эришилган.
Аввалроқ ИТБ Ўзбекистонга ажратадиган 600 миллион долларнинг деярли ярми қишлоқларни ривожлантиришга сарфланиши хабар қилинганди. Унга кўра, Ўзбекистонда Ислом тараққиёт банки (ИТБ) молиявий кўмаги билан «Қишлоқ жойларни барқарор ривожлантириш» лойиҳаси амалга оширилади.
Маълум қилинишича, ушбу лойиҳа Ўзбекистон Президентининг 2019 йил 5 мартдаги 4224-сонли ва Вазирлар Маҳкамасининг 2019 йил 23 майдаги 428-сонли қарорлари асосида Ислом тараққиёт банки томонидан ажратиладиган узоқ муддатли 600 миллион долларлик кредит доирасида амалга оширилади.