Таиланд ҳукумати марихуана сақлаганлик учун солинадиган жарима ва қамоқ жазоларини бекор қилиш орқали уни қонунийлаштирмоқчи. Бу ҳақда Bloomberg ёзмоқда.

Қайд этилишича, Таиланд озиқ-овқат ва фармацевтика идораси (FDA) Наркотик моддаларни назорат қилиш кенгашига марихуанани назорат қилинадиган дорилар рўйхатидан олиб ташлашни таклиф қилмоқчи. Таклиф кучга киришидан олдин у Соғлиқни сақлаш вазири Анутин Чарнвиракул томонидан ҳам тасдиқланиши керак.

FDA бош котиби ўринбосари Витид Сариддичайкулнинг сўзларига кўра, ушбу қонун одамларга марихуанадан тўсиқларсиз фойдаланиш, шунингдек, узоқ муддатли қамоқ жазоси ва жарималардан қочиш имконини беради. Ҳозирда Таиландда марихуана савдоси билан шуғулланганлик ҳамда уни сақлаганлик учун 15 йилгача қамоқ жазоси берилиши мумкин.

«Агар биз марихуанани қонунийлаштирсак, унинг бир қисмидан эмас, балки бутун ўсимликдан фойда олишимиз мумкин. Гул куртаклари ва уруғларидан тежамкорлик билан ва қонунга мувофиқ фойдаланиш мумкин», — дейди у.

Таиланд марихуанани қонунийлаштиришга босқичма-босқич ёндашмоқда. Мамлакатда ҳанузгача каннабис етиштириш ва йиғишни чекловчи қонунлар мавжуд. У наркотик сифатида таснифланганлиги сабабли, жисмоний шахсларга каннабисни сақлаш тақиқланади, аммо корхоналар ушбу ўсимликдан фойдаланишда кўпроқ имкониятга эга.

Бунга қадар Таиланд тиббий каннабисдан озиқ-овқат ва косметика соҳасида фойдаланишни қонунийлаштирган Жануби-Шарқий Осиёдаги биринчи давлат бўлганди.