Telegram’да криптовалюта юбориш имконияти пайдо бўлди
Трансфер учун тўлов олинмайди.
Telegram чатлари орқали фойдаланувчилар аввал Gram деб номланган криптовалюта — Toncoin юбориши мумкин, деб ёзади The Verge. Трансфер учун тўлов олинмайди.
Транзакцияни Telegram Wallet боти ёрдамида амалга ошириш мумкин. Бу банк картаси билан криптовалюта сотиб олиш, уни алмаштириш ва бошқа ҳамёнларга юбориш имконини беради.
Telegram 2020 йилда АҚШ Қимматли қоғозлар комиссиясининг (SEC) босими туфайли ўзининг криптовалюта лойиҳаси — Telegram Open Network (TON)ни ёпишга мажбур бўлди.
У компаниядан Gram савдосини тўхтатиб қўйишни талаб қилди ва ICO (коиннинг дастлабки таклифи) натижасида 1,7 миллиард долларлик токен савдосини рўйхатдан ўтказа олмаслигини маълум қилди.
TON жамоаси Telegram’дан мустақил равишда лойиҳа устида ишлашни давом эттирди ва уни Toncoin деб ўзгартирди.
Аввалроқ Россияда банклар томонидан нақд пул сотишнинг тақиқланиши фонида ижтимоий тармоқлар ва мессенжерларда валюта айирбошлаш бўйича гуруҳлар пайдо бўла бошлагани ҳақида хабар берилганди.