Тошкентда Қозоғистон сармояси билан миттитуман қурилади
Қозоғистон компанияси қурилиш учун 1 млрд доллардан ортиқ сармоя киритади.
6 декабрь куни Қозоғистон Президенти Қосим-Жўмарт Тўқаев Ўзбекистон Президенти Шавкат Мирзиёев билан музокаралар якунлари бўйича ўтказилган матбуот анжумани чоғида мамлакатнинг энг йирик қурилиш компанияси Тошкентда алоҳида миттитуман қуришни режалаштирганини маълум қилди.
«Бир қатор лойиҳаларни ишга тушириш бўйича келишувларга эришилди. Улар минглаб иш ўринлари яратишга қаратилган бўлиб, мамлакатларимиз фуқароларини ижтимоий қўллаб-қувватлашга катта ҳисса қўшади. Масалан, «Казфосфат» компанияси Тошкент вилоятида қиймати қарийб 1 миллиард долларга фосфор ва комплекс ўғитлар ишлаб чиқарувчи завод қуришга қизиқиш билдирган», — дейди Тўқаев.
Шунингдек, Қозоғистоннинг энг йирик қурилиш компанияси BI group 1 миллиард доллардан ортиқ сармоя киритиб, Тошкент шаҳрида алоҳида миттитуман қуришни режалаштираётгани маълум бўлди.
«Astana-Motors автосаноатимизнинг флагмани Ўзбекистонда Hyundai автомобилларини ишлаб чиқарадиган корхона қуришни режалаштирмоқда. Тез орада икки давлат чегарасида халқаро саноат кооперацияси марказининг ишга туширилиши катта мультипликатив самара ва фойда беради. Марказ Марказий Осиёдаги энг йирик савдо ва саноат марказига айланиши мўлжалланган. Бу нафақат икки томонлама, балки минтақавий миқёсда ҳам савдо-сотиқни ривожлантиришга хизмат қилади, транспорт-логистика имкониятларимизни кенгайтиради. Шу муносабат билан ҳукуматларга мазкур иншоот қурилишини жадаллаштириш топширилган», — дейди Қозоғистон Президенти.
Унинг сўзларига кўра, Қозоғистон ва Ўзбекистон Евроосиёнинг муҳим савдо ва транспорт йўлаклари чорраҳасида жойлашган. Бу соҳани янада ривожлантириш мақсадида бир қатор стратегик муҳим лойиҳаларни амалга оширишни жадаллаштириш бўйича келишувга эришилган.
Аввалроқ Ўзбекистон ва Қозоғистоннинг ўзаро савдо ҳажми рекорд даражага етиши кутилаётгани хабар қилинганди. Шунингдек, Қозоғистон Ўзбекистоннинг Шанхай ҳамкорлик ташкилоти ва Иқтисодий ҳамкорлик ташкилотига раислиги доирасидаги фаолиятини қўллаб-қувватлаши ҳақида хабар берилганди.