«Туркия ва туркий мамлакатлар ўртасидаги савдо-иқтисодий алоқалар» конференцияси доирасида туркий давлатлар учун бир хил иқтисодий нигоҳларни белгилаш мақсадида вазирлар йиғилиши ўтказилди. Бу ҳақда Ўзбекистон Инвестициялар ва савдо вазирлиги матбуот хизмати хабар берди.

Маълум қилинишича, тадбирда Ўзбекистондан бош вазир ўринбосари — инвестициялар ва ташқи савдо вазири Сардор Умурзоқов иштирок этган. Шунингдек, Туркия савдо вазири Меҳмет Муш, Озарбайжон иқтисодиёт вазири Микайил Жабборов, Қозоғистон миллий иқтисодиёт вазири Асет Иргалиев, Қирғизистон иқтисодиёт ва савдо вазири Данияр Амангелдиев тадбирда қатнашган.

Қайд этилишича, учрашувда инвестициявий муҳитни тизимли такомиллаштириш бўйича мустаҳкам қонунчилик базасини яратиш ҳамда истиқболли лойиҳаларни амалга ошириш учун тадбиркорларни жалб қилиш муҳимлиги қайд этилган. Шунингдек, учрашув иштирокчилари минтақа ичида ва трансчегаравий савдони ривожлантириш орқали туркий тилли мамлакатлар ўртасида товар айирбошлаш ҳажмини ошириш бўйича қўшма чораларни кўришни қўллаб-қувватлаган.

Хабарга кўра, туркий кенгашга аъзо давлатлар ўртасида имтиёзли ва эркин савдо режимларини ўрнатиш, меъёрий-ҳуқуқий базани такомиллаштириш, божхона тартиб-таомилларини стандартлаштириш ҳамда мавжуд тариф ва нотариф тўсиқларни олиб ташлаш ишлари ҳам жадаллаштирилади. Туркий Кенгашга аъзо мамлакатлар ишлаб чиқарувчилари ва экспортчилари учун бизнес алоқаларни фаоллаштириш ҳамда ишбилармон доиралар ўртасида бевосита муносабатларни йўлга қўйиш мақсадида мунтазам равишда бизнес-форумлар, савдо миссиялари ва қўшма тадбирлар ўтказиш долзарблиги юзасидан якдил фикрга келинган.

Иқтисодиётнинг турли тармоқларига «яшил» технологияларни жорий этишга қаратилган қўшма лойиҳаларни амалга оширишга урғу берган ҳолда энергетика соҳасидаги ҳамкорликка ўзаро тайёрлик ҳам билдирилган. Йиғилиш иштирокчилари минтақа мамлакатларининг транспорт ва транзит салоҳиятини ошириш, жумладан, транспорт-логистика инфратузилмасини кенгайтириш ва модернизация қилиш бўйича қўшма лойиҳаларда иштирок этиш чора-тадбирларига алоҳида эътибор қаратган.

Тадбир якунлари бўйича бир қатор муҳим келишувларга эришилган. Хусусан, минтақанинг ички бозорларини ривожлантириш мақсадида кенгашга аъзо давлатлар тадбиркорлари ва экспортчилари бевосита ўзаро ҳамкорлик қилишлари учун ягона электрон савдо майдончасини яратиш бўйича биргаликда иш олиб боришга келишилган. Томонлар, шунингдек, минтақалараро саноат кооперациясини ривожлантириш ва қўшилган қиймат занжирларини шакллантиришга қаратилган истиқболли лойиҳаларни амалга ошириш бўйича аниқ таклифлар ишлаб чиқади.

Таъкидланишича, Туркий кенгашга аъзо мамлакатлар «яшил» технологиялар соҳасида ҳамкорликни ривожлантириш учун қўшма «Йўл харитаси»ни ишлаб чиққан. Шунингдек, уни тасдиқлашга ҳамда 2022 йил сентябрида Ўзбекистонда ўтказилиши режалаштирилган «Яшил энергетика» халқаро форумида ўз вакилларининг иштирокини таъминлашга келишиб олинган.

Шу билан бирга, бир қатор қўшма тадбирлар, жумладан, туркий тилли давлатлар саноат ҳамкорлиги бўйича биринчи Форумини, шунингдек, кенгашга аъзо мамлакатларнинг ёшлар вакиллари иштирокида ҳар йили Ёш тадбиркорлар форумини ўтказишга келишиб олинган. Шу ўринда, томонлар кенгашга аъзо мамлакатлар IT ва технопаркларининг ҳамкорлик дастурлари доирасида ёшлар тадбиркорлиги ва стартапларни илгари суриш бўйича ҳамкорлик қилишга келишиб олган.

Аввалроқ Туркия шаҳарларида Made in Uzbekistan кўргазмаси ўтказилиши хабар қилинганди. Шунингдек, Ўзбекистон ва Туркия халқаро юк ташувлари соҳасида E-Permit тизимини ишга тушириши ҳақида хабар берилди.