Бугун, 28 декабрь куни Кинематография агентлигининг бир йиллик фаолияти бўйича йил сарҳисобига бағишланган маросим бўлиб ўтди.

Унда йил давомида, хусусан «Ипак йўли дурдонаси» XIII Тошкент халқаро кинофестивалини ташкиллаштириш ва халқаро фестиваллар даражасида ўтказишда Кинематография агентлигига яқиндан кўмак берган Ўзбекистон Вазирлар Маҳкамаси Марказий аппарати ходимлари, вазирлик ва ташкилотлар раҳбарлари, агентлик ва тизим ташкилотлари ходимлари киноижодкорлар ва оммавий ахборот воситалари вакиллари тантанали равишда тақдирланди. Бош вазир ўринбосари Азиз Абдуҳакимов томонидан ташаккурнома ва эсдалик совғалари топширилди.

Шунингдек, «Ипак йўли дурдонаси» XIII Тошкент халқаро кинофестивалида ўтказилган тадбирлар, ижодий лойиҳалар ва натижалар бўйича видеороликлар намойиш этилди. Маросим давомида йиғилганларга шоу-концерт, таниқли юлдузлар ва киноижодкорлар иштирокидаги намойишлар, йил йил байрами табриклари тақдим этилди.

Кечки дастурда, Кинематография агентлиги буюртмасига биноан «Ёшлик киностудияси» ДУК томонидан суратга олинган «101 рейс» бадиий фильмининг ёпиқ намойиши бўлиб ўтди. Фильм ижодкорлари ҳам ташриф буюрди. Намойишга ОАВ вакиллари, мутахассислар, ижодкорлар, «Ўзбекистон ҳаво йўллари» тизими ходимлари ва ёшлар таклиф этилган.

«101 рейс» кинокартинаси 2001 йил 11 сентябрь куни машъум теракт туфайли Тошкент-Нью-Йорк йўналишида парвоз қилган «Ўзбекистон ҳаво йўллари» самолёти экипаж аъзоларининг фавқулодда жасорати тўғрисида ҳикоя қилинади.  Сценарий муаллифи ва режиссёр Акром Шоҳназаров, иккинчи режиссёр Гўзал Юсупова, постановкачи оператор Дилмурод Турдибоев, рассом Алишер Тўлабоев.

Фильмда бош қаҳрамон ролини марҳум актёр Ҳошим Арслонов ижро қилган. Ролларда Умид Искандаров, Самиддин Лутфуллаев, Лола Элтоева, Нигина Анорбоева, Баҳора Арслонова, Эркин Бозоров ва бошқалар иштирок этган.