2021 йилда турли соҳада фаолият олиб борувчи турли компаниялар ребрендинг ўтказди. Уларнинг баъзилари фақат компания логотипини ўзгартирган бўлса, бошқалари бутун бошли концепцияни янгилади. Қуйида бу йил ребрендинг ўтказган машҳур компаниялар ҳақида сўз боради.

Meta

2021 йилнинг энг машҳур ребрендингини миллиардер Марк Цукерберг ўтказди. Энди Facebook Meta деб номланади. Компания янги ном билан бирга чексизлик белгисига эга бўлди.

Таҳлилчиларнинг фикрига кўра, бир неча катта лойиҳани ўз атрофида бирлаштирган мега компания ортиқ ижтимоий тармоқ номи билан аталиши мумкин эмасди. Бундан ташқари, эски ном Марк Цукерберг жамоасининг мақсадларини ўзида акс эттирмаётганди.

General Motors

Дунёдаги энг йирик автомобиль ишлаб чиқарувчи корпорациялардан бири ҳисобланган General Motors ҳам 2021 йилда ребрендинг ўтказди.

Янги эмблема Ultium технологияси ва электр вилкасини акс эттирган. Концепцияни ўзгартириш брендни электромобиллар ишлаб чиқаришга йўналтиришнинг бир қисми сифатида амалга оширилди.

Burger King

2021 йилда Burger King — тез овқатланиш тармоғи ҳам ребрендинг ўтказганини эълон қилди. Компания маҳсулот логотипи билан биргаликда қадоқлаш, ходимларнинг формаси ва ресторанлар тармоғининг дизайнини ҳам ўзгартирди.

Аслини олганда, Burger King’нинг логотипи классик кўринишига қайтди. Компаниянинг ҳозирги белгиси 1969-1999 йиллардаги логотипига жуда ўхшайди.

Volvo

2021 йилда яна бир автомобиль ишлаб чиқарувчи концерн ребрендинг ўтказишга қарор қилди. Логотип янада ихчамлашди. Янги белги 2023 йилдан автомобилларда пайдо бўлади.

Volvo логотипининг умумий услуби 90 йил давомида ўзгармаган, ҳатто шрифт ҳам ўша-ўша. Аммо логотипнинг ўзи энди максимум даражада соддалаштирилган. Ҳатто тарихда биринчи марта марказий таянч ҳам бекор қилинди, энди Volvo ёзуви ҳавода осилиб турибди, думалоқ ҳалқаси эса ингичка бўлиб қолди.

«Яндекс»

13 йил деганда Россия трансмиллий компанияси «Яндекс» ҳам ребрендинг ўтказди. Компаниянинг дизайн директори янгилик зарурлигини аввалги логотипни ишлаб чиқишда ҳеч ким интернет-компания озиқ-овқат етказиб бериши, тўловларни қайта ишлаши ва ўзи бошқариладиган автомобиллар ишлаб чиқиши мумкинлиги ҳақида ўйламагани билан изоҳлаган.

«Яндекс» корпоратив идентификаторининг биринчи версияси 1999 йилда Лебедевнинг студияси мутахассислари томонидан ишлаб чиқилган, 2004 йилда эса логотип модернизация қилинган.