АҚШда ишсизлик даражаси январь ойида 4 фоизга ошди. Бу ҳақда «Коммерсантъ» хабар берди.

Маълумотларга кўра, январь ойида мамлакатда ишсизлик даражаси 4 фоизни ташкил этган, бу 2021 йил июнь ойидан бери илк ўсишдир. 2021 йил декабрь ойида ишсизлик 3,9 фоизни ташкил этган ва мутахассислар январь ойида бу кўрсаткич ўзгаришини кутмаганди. Таққослаш учун, 2020 йилнинг февраль ойида, яъни пандемия бошланишидан олдин АҚШда ишсизлик 3,5 фоизни ташкил этган.

Яна бир кутилмаган жиҳат иш ўринлари сонининг сезиларли даражада ўсиши бўлган — 467 мингтага. Айни пайтда, фақат 150 мингта иш ўрни қўшилиши башорат қилинган ва баъзи экспертлар ҳатто уларнинг қисқаришини кутган. Энг кўп иш ўринлари дам олиш ва меҳмондўстлик саноатида қўшилган — 151 минг.

Шунингдек, савдо корхоналарига ихтисослаштирилган хизмат кўрсатиш соҳасида — 86 минг, чакана савдода — 61 минг. Шу билан бирга, мамлакатда иш ўринларининг умумий сони 2020 йил февраль ойида пандемия бошланишидан олдинги кўрсаткичдан 1,9 фоизга ёки 2,9 миллион кишига кам.

«Январь ойидаги иш ўринлари ҳисоботи ҳар томонлама кутилганидан яхши натижа берди. Меҳнат бозорининг тикланиши январь ойидаги «омикрон» тўлқини томонидан қўйилган тўсиқдан осонгина ўтиб кетди», — деган Wells Fargo иқтисодчилари Сара Хаус ва Майкл Пульезе.

Уларнинг таъкидлашича, АҚШда 10,9 миллион банд қилинмаган иш ўрни мавжуд.

Аввалроқ Жо Байден давридаги АҚШ иқтисодиёти қанчалик ўзгаргани хабар қилинганди. Шунингдек, АҚШ давлат қарзи биринчи марта 30 трлн доллардан ошгани ҳақида хабар берилди.