Россия Марказий банки «Консерватив тижорат банк»нинг (КТБ) лицензиясини қайтариб олди. Бу ҳақда тартибга солувчи орган сайтидаги баёнотда сўз боради. КТБ WebMoney пул ўтказмалари тизимининг ҳисоб-китоб банки ҳисобланади.

Қайд этилишича, банкнинг лицензияси 11 февралдан бошлаб бекор қилинган. Марказий банк КТБ жиноий фаолиятдан олинган даромадларни легаллаштириш ва терроризмни молиялаштиришга қарши курашиш соҳасида қонун бузилишларига йўл қўйганини лицензия бекор қилинишига сабаб сифатида кўрсатган.

Бундан ташқари, ҳисоботда айтилишича, банк федерал қонунлар ва Марказий банкнинг банк фаолиятини тартибга солувчи қоидаларини бузган, шунинг учун регулятор ўтган йил давомида бир неча марта чоралар кўрган, хусусан, айрим операцияларни амалга оширишга чекловлар қўйган.

«Кредит ташкилотининг фаолияти унинг ‘соядаги’ қимор бизнесига, молия бозорининг ноқонуний иштирокчиларига хизмат кўрсатишда иштирок этиш хавфи ортиши билан тавсифланади», дейилади Россия банки баёнотида.

Регуляторга кўра, КТБ аслида «анъанавий банк иши» билан шуғулланмай, электрон тижорат хизматларини кўрсатмаган ва мижозларнинг шаффоф бўлмаган маблағ манбаларини, шунингдек, уларнинг иқтисодий асосларини ўрганмаган.

Марказий банк 1,4 миллион рублдан кўп бўлмаган миқдорда КТБнинг ҳар бир омонатчисига маблағлар 100 фоиз қайтарилишини кўрсатган. Маблағлар қайтарилиши билан «Омонатларни суғурталаш агентлиги» давлат корпорацияси шуғулланади.

Банкни «Омонатларни суғурталаш агентлиги»нинг вақтинчалик маъмурияти бошқаради, КТБнинг ижро этувчи органлари эса ваколатларидан маҳрум этилган.