Brent маркали нефть нархи 2014 йилдан бери илк бор баррель учун 99 доллардан ошди. Бу ҳақда «Интерфакс» ёзмоқда.

Қайд этилишича, 22 февраль куни Украина шарқидаги геосиёсий вазиятнинг ёмонлашуви ортидан нефть нархининг ошиши тезлашган.

Лондоннинг ICE Futures биржасида Brent нефтининг апрель фьючерслари 3,76 долларга (3,94 фоизга) ошиб, бир баррель учун 99,15 долларни ташкил қилган. Котировкалар 2014 йил сентябрь ойидан бери биринчи марта бир баррель учун 99 доллардан ошган.

Нью-йорк товар биржаси NYMEX электрон савдоларида март ойидаги WTI фьючерсларининг нархи шу вақтга келиб 4,65 долларга (5,11 фоиз) ошиб, бир баррель учун 95,72 долларгача кўтарилди.

Украина шарқидаги геосиёсий вазиятнинг ёмонлашуви эса Россия Президенти Владимир Путиннинг Донецк ва Луганск халқ республикалари мустақиллигини тан олиш ҳақидаги фармонларни имзолагани ҳамда Россия Федерацияси Қуролли кучларига ўзини ўзи эълон қилган республикаларда тинчликпарварлик функцияларини бажаришга кўрсатма бергани билан изоҳланади.

Қайд этиш керакки, Ғарб давлатлари Москванинг ҳаракатларини халқаро ҳуқуқнинг бузилиши деб баҳолаб, санкциялар қўллаши мумкинлигини эълон қилган.

Маълумот учун, айни вақтда Украина ва Россия чегарасида кескин ҳарбий ҳолат сақланиб қолмоқда. Икки давлат муносабатларининг бу даражада совуқлашиши 2013 йилга бориб тақалади. Зиддиятга Россия билан бевосита умумий чегарага эга бўлган Украинанинг Ғарбга яқинлашиши ҳамда НАТО ва Европа Иттифоқи каби ташкилотлар аъзосига айланиш хавфи сабаб бўлган.

Тан олинмаган Донецк ва Луганск Халқ Республикалари Донбасс деб аталмиш регионда, Украина ва Россия ўртасида жойлашган. Улар аввал Украина таркибига кирувчи мамлакатнинг шарқида жойлашган Донецк ва Луганск вилоятлари ҳисобланган. Бироқ 2013 йилда Украинада бошланган сиёсий инқироздан сўнг, ушбу вилоятлар Россиянинг «кўмагида» мустақил республикага айланган.

Ҳозирда айни ушбу ҳудудда ҳарбий ҳаракатлар кетаётгани ҳақида хабарлар тарқалмоқда. Рус нашрлари Украина тан олинмаган Донецк ва Луганск республикалари ҳудудини ўққа тутаётгани ҳақида ёзмоқда.