Европа Иттифоқига (ЕИ) аъзо барча 27 та давлат Россияга қарши санкциялар тўпламини қабул қилиш тўғрисида бир овоздан қарорга келишди. Бу ҳақда ТАСС ёзмоқда.

«Брюссель Қўшма Штатлар, Буюк Британия ва Канада билан келишилган ҳолда янги чеклов чоралари бўйича келишиб олди», — дейди ЕИ бош дипломати Жозеп Боррель Париждаги Иттифоқ кенгашининг фавқулодда йиғилишидан сўнг матбуот анжуманида.

Жозеп Боррель сўзларига кўра, Европа Иттифоқи Россияга жуда

«24 соатдан кейин биз қатъиятимизни кўрсатган ҳолда тезкор жавоб бердик. Бир овоздан Россияга зарар етказадиган, жуда катта зарар келтирадиган санкциялар пакетини қабул қилишга келишдик», — дейди у.

Боррелнинг сўзларига кўра, янги пакет Лунаск ва Донецк мустақиллиги учун овоз берган Россия Давлат думасининг 351 нафар депутатига қарши санкцияларни ўз ичига олади. Бундан ташқари, ЕИ 27 жисмоний ва юридик шахсни, жумладан, Россиянинг Донбасдаги операцияларини молиялаштирадиган банк ва ташкилотларни қора рўйхатга киритган.

Маълум бўлишича, Европа Иттифоқи, шунингдек, Луганск ва Донецк билан ишбилармонлик алоқаларини тақиқлаган. Шунингдек, Россиянинг Европа Иттифоқи молия ҳамда капитал бозорларига киришини чеклашга қарор қилган.

Европа Иттифоқи дипломатияси раҳбари, шунингдек, Германиянинг «Шимолий оқим 2» сертификатини тўхтатиш ҳақидаги қарорини олқишлашини айтган.

«Санкциялар тўплами Европа Иттифоқи эмас, Германия томонидан қабул қилинган қарор билан тўлдирилди. Мен Германиянинг сертификатлаштиришни тўхтатиш, демак, ‘Шимолий оқим 2’ газ қувурини ишга тушириш бўйича бизнинг жавобимизни янада кучлироқ қиладиган қадамини олқишлайман. Европа Иттифоқи аъзолари ва АҚШ буни кўп марта сўрашганди», — дейди Боррель.

Россия Президенти Европа Иттифоқининг санкциялар рўйхатига киритилмаган.

«Путин санкциялар рўйхатида йўқ», — дейди у.

Аввалроқ Германия Россиянинг Луганск ва Донецкни тан олишига жавобан «Шимолий оқим-2» газ қувурини сертификатлашни тўхтатишга қарор қилгани хабар қилинганди. Шунингдек, Буюк Британия Россия банклари ва бизнесменларига қарши санкциялар киритгани ҳақида хабар берилганди.