Ўзбекистоннинг 24 та туман ва шаҳарлари қурилиш материаллари ишлаб чиқаришга ихтисослаштирилади. Бу ҳақда Nоrma хабар берди.

Маълум қилинишича, Президентнинг 2022 йил 21 февралдаги «Уй-жой қурилиши ва қурилиш материаллари саноатини қўллаб-қувватлашга доир қўшимча чора-тадбирлар тўғрисида»ги қарори қабул қилинган.

Қарорга кўра, қурилиш соҳаси ва қурилиш материаллари ишлаб чиқаришни ривожлантириш, ҳудудларда аҳоли учун арзон уй-жойлар қурилишини таъминлаш учун республиканинг 24 та туман ва шаҳарлари қурилиш материаллари ишлаб чиқаришга ихтисослаштирилади.

Шунингдек, республиканинг 8 та туманида хом ашёни қазиб олиш, қайта ишлаш ва лаборатория синовидан тайёр қурилиш ва қоплама материаллари ишлаб чиқаришгача бўлган қўшилган қиймат занжирини яратувчи қурилиш материаллари кластерлари шакллантирилади.

Бошқа ҳудудлар билан саноат кооперациясини ташкил этиш ҳисобига республиканинг 16 та туман ва шаҳрида қурилиш материаллари ишлаб чиқариш йўлга қўйилади. Ҳар бир ҳудудда қурилиш материаллари ишлаб чиқариш ва қурилиш объектларини лойиҳалашдан то тайёр кўп қаватли турар-жой биноларини қуришгача бўлган қиймат занжирини яратиб, камида битта уй-жой қурилиши кластерини ташкил этилади.

Бундан ташқари, 2022 йил 1 мартдан бошлаб барча юридик шахсларга республикада ишлаб чиқарилган цемент, цемент клинкери ва қурилиш ойналарини тўғридан-тўғри шартномалар асосида чекловларсиз (квоталарсиз) экспорт қилишга рухсат берилди.

Шунингдек, Экспортни қўллаб-қувватлаш агентлиги 2024 йил 1 январгача бўлган муддатда маҳаллий экспорт қилувчи корхоналарга (уларнинг ваколатли вакилларига) қурилиш материалларини автомобиль, темир йўл ва ҳаво транспортида барча давлатларга, шу жумладан қўшни давлатларга олиб ўтиш харажатларининг 50 фоизигача бўлган қисмини қоплаш учун субсидиялар ажратади.

Қайд этилишича, «Ўзсаноатқурилишбанк»га қурилиш материаллари ишлаб чиқариш лойиҳаларини молиялаштириш учун банкнинг камида 300 миллион доллар эквивалентидаги халқаро корпоратив облигацияларини чиқариш ва жойлаштириш, шунингдек, 2022 йил охиригача давлат кафолатисиз уй-жой қурилиши кластерларини қўллаб-қувватлаш учун хорижий кредит линиялари ҳисобидан 150 миллион доллар жалб этиш чораларини кўриш топширилди.

Хоразм вилояти бўйича Президентнинг 2021 йил 25 августдаги «Инвестиция лойиҳаларини ташқи инфраструктура билан таъминлаш чора-тадбирлари тўғрисида»ги қарорига мувофиқ давлат бюджети маблағлари ҳисобидан зарур ташқи муҳандислик-коммуникация тармоқлари билан таъминланган инвестиция лойиҳалари қиймати 50 миллиард сўмдан кам бўлмаган миқдорда белгиланган.

Таъкидланишича, умумий қиймати 50 миллиард сўмдан 200 миллиард сўмгача бўлган инвестиция лойиҳаларини ташқи муҳандислик-коммуникация тармоқлари билан таъминлаш харажатлари ушбу тартибга мувофиқ ушбу лойиҳалар қийматининг 20 фоизидан ошмаслиги керак.

Ҳужжат билан қуйидагилар тасдиқланди:

• 2022 йилда янги ташкил этилган қурилиш материаллари ва уй-жой қурилиши кластерларини ташқи муҳандислик-коммуникация тармоқлари билан таъминлаш дастури;
• 2022–2023 йилларда янги норуда конларини шакллантириш учун геология-қидирув ишларини амалга оширишнинг мақсадли режаси;
• уй-жой қурилиши ва қурилиш материаллари саноатини янада ривожлантириш чора-тадбирлари режаси.

Ҳужжат қонун ҳужжатлари маълумотлари миллий базасида эълон қилинган ва 2022 йил 22 февралдан кучга кирди.

Аввалроқ Ўзбекистоннинг ҳар бир ҳудудида камида биттадан уй-жой қурилиши кластерлари ташкил этилиши хабар қилинганди. Шунингдек, Ўзбекистонда уй-жой бошқарув компаниялари фойда ва мулк солиғидан озод этилиши ҳақида хабар берилди.