Энг йирик нефт қазиб олувчилар Саудия Арабистони ва Россия нефт ишлаб чиқаришни 2 миллион баррелга қисқартиришга келишиб олди. Бу ҳақда «Коммерсант» хабар берди.

ОПЕК+’нинг Венадаги йиғилишида ноябрь ойидан бошлаб нефт ишлаб чиқариш ҳажмини кунига 2 миллион баррелга камайтиришга келишиб олинди. Натижада Саудия Арабистони ва Россиянинг квоталари кунига 500 минг баррелга камаяди.

Россия учун бу фожеали ҳолат эмас. Сабаби мамлакат аллақачон ўз квотасидан анча кам ишлаб чиқаришни бошлаган. Шунингдек, Европа Иттифоқининг декабрь ойидан бошлаб Россия нефтига жорий этиладиган чекловлари туфайли бу миқдор янада камайиши кутилмоқда.

Маълумотларга кўра, ОПЕК+’нинг ушбу қарори нефт нархининг пасайиш тенденсиясини ўзгартириши мумкин. Сентябрь ойида 20 фоизга арзонлаб, 82 долларни ташкил этган нефт нархи ОПЕК+’нинг 5 октябрдаги қароридан кейин бир баррел учун 92 долларгача кўтарилди.

Нефть ишлаб чиқаришни 2 миллион баррелга қисқартириш тўғрисидаги қарори АҚШ ҳукуматининг кескин реакциясига сабаб бўлди. Сабаби оралиқ сайлов арафасида бензин нархининг ошиши демократлар учун оғир оқибатларга олиб келиши мумкин.

Оқ уй бу борада расман баёнот ҳам берди. Демократларнинг фикрича, мазкур қарор Саудия Арабистони валиаҳд шаҳзодаси Муҳаммад бин Салмоннинг АҚШда ноябрь ойида бўлиб ўтадиган оралиқ сайловларга таъсир кўрсатишга уриниши ҳисобланади. Ҳозирда Байден маъмурияти ОПЕК+’нинг ушбу қарорига нисбатан бир нечта жавоб чораларини тайёрланаётганини маълум қилди.

Маълумот учун, ОПЕК+ гуруҳига нефть экспорт қилувчи давлатлар ташкилоти (ОПЕК)нинг 13 та аъзоси, шунингдек, 10 та ҳамкор давлат, жумладан, Россия ҳам киради.