Ўзбекистонда IMEI кодларини клонлаш учун жавобгарлик жорий этилади
Ўзбекистонда IMEI кодларини клонлаш билан боғлиқ ҳолатни бартараф этиш мақсадида тегишли нормаларга ўзгартириш киритиш тўғрисида қонун лойиҳаси ишлаб чиқилмоқда
Ўзбекистонда IMEI кодларини клонлаш билан боғлиқ ҳолатни бартараф этиш мақсадида тегишли нормаларга ўзгартириш киритиш тўғрисида қонун лойиҳаси ишлаб чиқилмоқда. Бу ҳақда Тошкент шаҳар ИИББ матбуот хизмати хабар берди.
Маълум қилинишича, ҳозирда жиноятчини топиш ва уяли телефон аппаратини эгасига қайтариш учун мобил қурилма эгаси томонидан тақдим этилган IMEI кодидан фойдаланилмоқда. Бироқ технология ривожланиши билан бир қаторда жиноят изларини яшириш усуллари ҳам шунга монанд ривожланяпти. Яъни жиноятчилар эндиликда клонланган IMEI кодларини яратишмоқда.
Пойтахт ИИББнинг қайд этишича, бундай клонланган IMEI кодларини автоматик аниқлаш ва блокировка қилишнинг техник тартиби жорий этилмаган.
Клонлаш қуйидагича амалга оширилади: махсус дастурий таъминот воситасидан фойдаланган ҳолда IMEI коди битта мобил қурилмадан бир ёки бир нечта мобил қурилмаларга узатилади ва натижада тармоқда бир хил IMEI коди бўлган бир нечта мобил қурилмалар пайдо бўлади.
Бу ўз навбатида ўғирланган уяли телефонларни излаб топишни қийинлаштириб, ноқонуний олиб кирилган мобил қурилмаларни республика ҳудудида рўйхатдан ўтказиш имконини беради.
«Айни пайтда мобил қурилманинг халқаро идентификация кодини ноқонуний равишда ўзгартирганлик учун маъмурий ёки жиноий жавобгарлик мавжуд эмас. Бу эса жиноят изларини яширувчи шахслар жазосиз қолишига сабаб бўлмоқда», дейилади хабарда.
Шу билан бирга, бу каби казусли ҳолатни бартараф этиш мақсадида мутасадди ташкилотлар томонидан тегишли нормаларига ўзгартириш киритиш тўғрисида қонун лойиҳаси ишлаб чиқилмоқда.
