O‘zbekistonga «yashil” iqtisodiyot uchun Germaniyadan qo‘shimcha 3 mln yevro grant ajratildi
O‘zbekiston Germaniya xalqaro hamkorlik jamiyati (GIZ)dan xususiy sektorni qo‘llab-quvvatlash va "yashil” sanoatni rivojlantirish uchun yana 3 mln yevro miqdorida grant olmoqda. Bu Germaniyaning "yashil” iqtisodiyotga o‘tish yo‘lida O‘zbekistonga ko‘rsatayotgan qo‘shimcha yordami bo‘lib, tomonlar o‘rtasida memorandum imzolandi.
13-noyabr kuni Birlashgan Millatlar Tashkilotining Iqlim o‘zgarishi bo‘yicha Tomonlar konferensiyasi (COP29) doirasida O‘zbekiston Iqtisodiyot va moliya vazirligi delegatsiyasi va Germaniya xalqaro hamkorlik jamiyati (GIZ) o‘rtasida «yashil” sanoatlashtirishda xususiy sektorni qo‘llab-quvvatlash loyihasi uchun qo‘shimcha grant ajratishga oid memorandum imzolandi.
Memorandumga ko‘ra, Germaniya O‘zbekistonda xususiy sektorning «yashil” iqtisodiyotga o‘tishini qo‘llab-quvvatlash maqsadida 3 million yevro miqdorida qo‘shimcha grant ajratadi. Bu loyiha doirasida ishtirokchilar karbonat angidrid gazini o‘lchash va sertifikatlash bo‘yicha ta’lim olishmoqda. Shuningdek, Germaniya tomoni O‘zbekistonga xorijda CO2 sertifikatlari savdosini amalga oshirish va Yevropa Ittifoqining transchegaraviy uglerod nazorati tizimiga (CBM) moslashishga yordam bermoqda.
Avvalroq, 2023-yil dekabr oyida imzolangan «O‘zbekistonda xususiy sektorga ko‘mak va iqtisodiy siyosatlar bo‘yicha maslahatlar” loyihasi doirasida Germaniya tomonidan 9 million yevro ajratilgan edi. Ushbu mablag‘lar O‘zbekistonning barqaror va «yashil” sanoatni rivojlantirish harakatlarini qo‘llab-quvvatlashga qaratilgan.
Joriy yilda O‘zbekiston karbonat angidrid emissiyasini kamaytirganlik uchun Jahon bankidan to‘lov olgan birinchi davlat bo‘ldi. Mamlakat uglerod emissiyalarini 500 ming tonnaga kamaytirib, bu uchun 7,5 mln dollar miqdorida grantga ega bo‘ldi. Mazkur mablag‘ning bir qismi aholiga elektr energiyasi va gaz tariflari oshishidan kelib chiqadigan zararni kamaytirish uchun yordam sifatida yo‘naltirilmoqda.
