O‘zbekistonda chiqindilarni yoqish orqali elektr energiyasi va turli mahsulotlar ishlab chiqaradigan 8 ta yangi zavod quriladi.  Bu haqda Chiqindilarni boshqarish va sirkulyar iqtisodiyotni rivojlantirish agentligi axborot xizmati xabar berdi.

Qayd etilishicha, Qurilish jarayonlari 2025-yilning yanvarida boshlanadi va zavodlar 2026-yil dekabrda ishga tushiriladi.

Ushbu loyihalar ekologik holatni yaxshilash, chiqindilarni qayta ishlash jarayonlarini rivojlantirish va aholi salomatligini saqlash maqsadida amalga oshirilmoqda.

Loyihalar doirasida Ekologiya, atrof-muhitni muhofaza qilish va iqlim o‘zgarishi vazirligi, Investitsiyalar, sanoat va savdo vazirligi, Energetika vazirligi hamda Xitoy, BAA va Janubiy Koreyaning 6 ta yirik kompaniyasi bilan hamkorlik shartnomalari imzolangan. Ular orasida “China CAMC Engineering”, “Shanghai SUS Environment”, “China Everbright Group”, “Chengdu Environmental Group”, BAAning “Tadweer Group” va Janubiy Koreyaning “Sejin” kabi kompaniyalari mavjud.

Umumiy qiymati 1,28 milliard dollarni tashkil etuvchi loyihalar natijasida O‘zbekistonning 11 ta hududida, jumladan, Andijon, Buxoro, Jizzax, Qashqadaryo, Navoiy, Namangan, Samarqand, Sirdaryo, Farg‘ona, Toshkent viloyatlari va Toshkent shahrida chiqindilarni yoqish orqali elektr energiyasi ishlab chiqarish zavodlari barpo etiladi. Mazkur zavodlar orqali yiliga 4,7 million tonnadan ortiq chiqindi yoqilib, 2,1 milliard kVt/soat elektr energiyasi ishlab chiqariladi. Natijada, poligonlar soni 5 baravar kamayadi va 97 million dollar qiymatdagi elektr energiyasi sotiladi. Shuningdek, bu jarayonlar 152 million kub/metr tabiiy gazni tejashga, 2,4 million tonna issiqxona gazlarini kamaytirishga ham yordam beradi.

Loyihalar davomida 1,200 ta yangi ish o‘rni yaratiladi, bu esa aholiga qo‘shimcha ish imkoniyatlarini taqdim etadi.