Havo haroratining keskin pasayishi oqibatida mamlakatda tabiiy gazga bo‘lgan talab sezilarli darajada oshdi. Energetika vazirligi ta’kidlashicha, gaz transport tizimi obyektlari maksimal quvvatda ishlayotganiga qaramay, ayrim hududlarda gaz bosimining pasayishi va ta’minotda uzilishlar kuzatilmoqda. Bu holat, ayniqsa, aholi xonadonlari va ijtimoiy soha obyektlari (tibbiyot muassasalari, maktablar, oliy ta’lim muassasalari va boshqalar) uchun muhim bo‘lgan tabiiy gaz ta’minotida jiddiy muammolarni keltirib chiqarmoqda.

Shu bois, birinchi navbatda aholi va ijtimoiy muassasalarni tabiiy gaz bilan uzluksiz ta’minlash ustuvor vazifa sifatida belgilangan holda, gaz to‘ldirish shoxobchalariga (gaz zapravkalar) qisqa muddatli cheklovlar kiritish rejalashtirilmoqda. Ushbu cheklovlar hududlardagi mahalliy hokimliklar bilan hamkorlikda ishlab chiqilgan reja-grafiklar asosida amalga oshiriladi va rasmiy axborot manbalarida e’lon qilinadi.

Benzin ta’minoti bo‘yicha ham bir qator chora-tadbirlar ko‘rilmoqda. Sovuq havo oqimi tufayli benzin bozorida talabning ortishi natijasida, birjaga chiqariladigan benzin hajmi vaqtinchalik ikki barobarga oshiriladi. Vazirlik, benzin bozoridagi vaziyatni davlat nazoratiga olish bilan birga, zaxiralar yaratish orqali barcha hududlarda zarur miqdorda benzin ta’minotini kafolatlaydi.

Shuningdek, xususiy avtozapravka egalaridan narxlarni sun’iy ravishda oshirmaslik, benzinning sifati va miqdorini to‘g‘ri ta’minlash so‘ralmoqda. Energetika vazirligi tomonidan tashkil etilgan ishchi guruhlar joylarda nazorat tadbirlarini olib bormoqda va narxlarning asossiz oshishiga yo‘l qo‘yilmaydi.