Toshkent viloyatida issiq suv va isitish ta’minoti uchun yangi tariflar belgilandi. Joriy yilning 6-yanvarida xalq deputatlari viloyat Kengashining qarori bilan narxlar oshirilishi ma’lum qilindi. Yangi tariflar 1-fevraldan kuchga kiradi.

Qarorga ko‘ra, viloyatdagi «Issiqlik manbai» ishlab chiqarish boshqarmasi, «Angren issiqlik quvvati» DUK, Chirchiq «Issiqlik quvvati» va «Olmaliq issiqlik manbai» korxonalari tomonidan ko‘rsatiladigan issiqlik ta’minoti xizmatlari narxlari o‘zgartiriladi. Yangi tariflar quyidagicha:

– «Issiqlik manbai» boshqarmasi: 1 Gkal issiqlik quvvati uchun aholi uchun 93 464 so‘m (avvalgi narx 81 312 so‘m);

– «Angren issiqlik quvvati»: 93 508 so‘m (avvalgi narx 81 312 so‘m);

– Chirchiq «Issiqlik quvvati»: 101 301,2 so‘m (avvalgi narx 88 088 so‘m);

– «Olmaliq issiqlik manbai»: 100 800 so‘m (avvalgi narx 92 252,16 so‘m).

Yangi tariflar QQS bilan hisoblanib, har bir korxona tomonidan issiq suv va isitish xizmatlari uchun alohida shartlar belgilangan. Bunda hisoblagichlarning mavjudligi yoki yo‘qligi tariflarga ta’sir ko‘rsatadi.

Shuningdek, budjet tashkilotlari va ulgurji iste’molchilar uchun ham narxlar oshiriladi. 2024-yil 15-noyabrdan Toshkent shahrida issiqlik ta’minoti uchun tariflar oshirilgani ma’lum qilingan edi. Aholi uchun 1 Gkal narxi 121 617 so‘m, ulgurji tashkilotlar uchun esa 244 497 so‘mni tashkil etadi.

Iqtisodiyot va moliya vaziri Jamshid Qo‘chqorov 2025-yilda poytaxtda issiqlik ta’minoti narxlari ikki baravarga oshishini ta’kidlab, bozor va tariflar o‘rtasidagi farqning katta ekanligini, shuningdek, narxlarni tartibga solishda qiyinchiliklar yuzaga kelishini aytib o‘tdi.