Февраль ойида Ўзбекистонга енгил автомобиллар импорти сезиларли даражада камайди. Бу ҳақда Божхона қўмитаси маълумотларига таяниб, Spot хабар берди.

Ўтган ойда мамлакатга қиймати 44,87 миллион доллар бўлган 2570 та енгил автомобиль олиб кирилган. 2024 йил февраль ойига нисбатан импорт ҳажми 3,53 баравар, сон жиҳатдан эса 2,82 баравар камайган.

Жами 1586 дона бензин двигателли енгил автомобиль импорт қилинган, бу 2,78 баравар пасайишни англатади. Пул кўринишида импорт ҳажми 97,1 миллион доллардан 34,2 миллион долларга камайган (2,83 баравар қисқариш). Чет эл автомобилларининг ўртача нархи тахминан 1,8 фоизга пасайиб, 21,56 минг долларни ташкил этган (ҚҚС ва божхона тўловларисиз).

Ўз навбатида, «яшил» транспорт воситалари импорти унчалик кескин камаймаган. Масалан, электр двигателли енгил автомобиллар импорти 2 мартадан кўпроқ камайиб, 1905 тадан 940 тага тушган. Бироқ пул кўринишида бу кўрсаткич 4,32 баравар қисқариб, 9,5 миллион долларни ташкил этган. Электрокарларнинг ўртача нархи эса 2 мартадан кўпроқ арзонлашган — 10,21 минг долларгача.

Бензин ва электр двигателига эга гибрид автомобиллар атиги 44 дона импорт қилинган, бу 21 баравар камайишни англатади. Гибрид автомобиллар импортининг умумий қиймати деярли 18 баравар пасайиб, 1,15 миллион доллардан бироз ошган. Бироқ олиб келинган машиналарнинг ўртача нархи 18,1 фоизга ошиб, 22,23 минг доллардан 26,26 минг долларга етган.

Февраль якунларига кўра, ички ёнув двигателига эга автомобилларнинг импортдаги улуши 60,99 фоиздан 61,71 фоизгача ошган, электр автомобилларнинг улуши эса 26,27 фоиздан 36,58 фоизгача кўтарилган. Шу билан бирга, гибрид автомобилларнинг улуши 12,74 фоиздан 1,71 фоизгача кескин тушиб кетган. Шундай қилиб, янги энергия манбаларига (NEV) эга автомобиллар умумий импортнинг 38 фоиздан ортиғини ташкил этган.