Ҳужжат билан мижозларни хабардор қилиш талабларини кучайтириш белгиланган. Хусусан, кредит карталарини расмийлаштиришда ахборот варақасини тузиш амалиётини жорий этиш режалаштирилмоқда.

Ахборот варақаси истеъмолчиларга кредит карта шартлари тўғисида тўғри ва тўлиқ маълумот бериш ҳамда кредит карта шартларини таққослаш имконини беради. Карта ёки кредитни расмийлаштиришда иловада варақани электрон форматда тузиш ва юклаб олиш мумкин бўлади.

Рўйхатга қуйидаги маълумотлар киради:

• тўлов тизими (Visa, Mastercard, Humo ва бошқалар);
• кредит лимити (минимум ва максимум миқдори);
• харидлар, пул ўтказмалари, лимитни нақдлаштириш ва бошқа операциялар учун фоиз ставкалари;
• тўлиқ йиллик фоиз ставкаси (APR);
• фоизсиз (greys) давр, у амал қилувчи ва амал қилмайдиган операциялар;
• ойлик минимал тўлов;
• карта бўйича қарзни тўлаш санаси ёки уни аниқлаш тартиби;
• операциялар бўйича кўчирма бериш санаси;
• шартнома шартлари бажарилмаганлиги ва муддати ўтган тўловлар бўйича жарима ва пенялар;
• карта бўйича таъминот (зарур бўлганда);
• картани расмийлаштириш муддатлари;
• лимитдан воз кечиш муддати;
• доимий муддатли тўловлар (абонент тўлови ва ҳ.к.);
• харидлар, ўтказмалар, нақдлаштириш ва бошқа операциялар, Ўзбекистондан ташқаридаги транзакциялар учун комиссиялар;
• картани чиқариш ва қайта чиқариш учун тўлов.

Банклар томонидан қарз олувчиларга кредит тақдим этиш тўғрисидаги аризаси ижрога қабул қилинганлиги тўғрисида SMS-хабарнома юборилишини таъминлашлари керак бўлади.

Шунингдек, лойиҳа билан қуйидаги талабларни киритиш илгари сурилмоқда:

• кредит шартномаларига қарздорнинг ҳисобварағларида ҳар қандай давр мобайнида маълум миқдордаги камаймайдиган пул маблағи қолдиғи ёки айланмаси мавжуд бўлиши юзасидан шарт киритилишини чеклаш;
• кредит таъминотига қабул қилинган гаров мулкларини кредитнинг асосий қарзи қолдиғига мутаносиб равишда босқичма-босқич гаровдан чиқариш ёки гаров нарсасини алмаштириш бўйича шаффофликни таъминлаш;
• банкнинг кредитор сифатидаги ҳуқуқлари суғурта қилувчига суброгация орқали ўтганда, бу тўғрисида қарздорни белгиланган тартибда хабардор қилиш;
• банк ва гаровга қўювчи келишган ҳолда кредит қарздорлигини қоплаш учун гаровга қўйилган мол-мулкни суддан ташқари тартибда сотиш.

Марказий банкнинг қайд этишича, лойиҳа банкларнинг айрим инсофсиз амалиётларидан фойдаланишни чеклаш ва кредит аризаларини кўриб чиқишда уларнинг масъулиятини ошириш имконини беради.