Энди банклар топ-300 талик олийгоҳга кирганларга имтиёзли таълим кредити ажратади. Бу ҳақда 30 июнь куни Шавкат Мирзиёевнинг ёшлар билан учрашувида маълум қилинди.

Жорий йил февраль ойида ўтган учрашувда ёшлар учун 40 дан зиёд янги ташаббуслар эълон қилиниб, қарийб $500 млн ажратилди. Бу йил $35 млрдлик 8 300 та лойиҳа ишга туширилиб, 292 мингта иш ўрни яратилади. Яна 500 мингта иш ўрни яратадиган $83 млрдлик лойиҳалар режалаштирилган.

Масалан, энергетикада $20 млрд, нефть-газ ва кимёда $11 млрд, тоғ-конда $7 млрд, электротехника ва автомобилсозликда $4,5 млрдлик минглаб корхоналар ишга тушади.

Ишлар бошланиши билан «яшил» иқтисодиёт, «яшил» энергия, рақамли геология, технологик минераллар, био-инженерия йўналишларида минглаб мутахассисларга талаб ошиши кутилмоқда.

Эл-юрт умиди жамғармасининг стипендия танлови доирасида топ-300 талик олийгоҳга кирганлар учун ўқиш ва яшаш харажатини қоплаш тизими янги тартибда ишлай бошлайди.

STEM йўналишлари (илм-фан, технология, муҳандислик ва математика), энергетика, транспорт, урбанизация, архитектура, қурилиш, қишлоқ ва сув хўжалиги каби драйвер соҳалар учун квоталар бир неча баробар оширилади.

Эндиликда банклар топ-300 талик олийгоҳга кирган ёшларга $20 минггача имтиёзли таълим кредити беради.

Бундан ташқари, «Гарвардчилар» мактаби Беруний номидаги халқаро мактаб сифатида фаолиятини бошлади. Ушбу халқаро мактабга бу йилги 8-синф битирувчилари орасидан 60 нафар ўқувчи саралаб олинади ва 3 та йўналишда ўқитилади. Келгусида ўқув ўринлари каррасига кўпайтирилади.

Миллий дастур асосида ҳар йили энг салоҳиятли 3 минг ўқувчи селекция қилиниб, Гарвард, Йель, Колумбия, Корнел каби нуфузли олийгоҳларга тайёрланади. Шундан камида 300 нафари эҳтиёжманд оила фарзандлари бўлади.