Бироқ, кредит рейтинги прогнози биринчи марта «барқарор» даражадан «ижобий» даражага яхшиланди.

Қисқача шарҳда S&P таъкидлашича, олтиннинг юқори нархлари Ўзбекистон экспорти ва буджет тушумларини қўллаб-қувватлайди, шунингдек, юқори валюта захираларини сақлаб қолишга ёрдам беради.

Ўз навбатида, ялпи ички маҳсулотнинг нисбатан юқори ўсиши жаҳон савдосидаги қийинчиликлар ва дунёдаги ноаниқликларга қарамай, иқтисодий ислоҳотлар, барқарор ички талаб, инвестициялар ва меҳнат мигрантларининг пул ўтказмалари ҳисобига таъминланади.

Иқтисодий ўсиш ва буджет консолидацияси бўйича саъй-ҳаракатлар ҳукуматга буджет тақчиллиги ва давлат қарзининг кўпайишини жиловлашга ёрдам беради.

Агентлик ҳукумат бюджет консолидацияси билан бир қаторда иқтисодиёт ва давлат бошқаруви соҳаларида ислоҳотларни давом эттиришини кутмоқда. Ижобий сценарийни асослашда экспорт ва солиқ тушумларини қўллаб-қувватлайдиган олтин нархининг ошиши кутилмоқда.

Президент ёрдамчиси Саида Мирзиёева ўз Telegram-каналида суверен кредит рейтинги прогнозининг яхшиланиши «жаҳон молия ҳамжамиятининг Ўзбекистондаги ислоҳотларга ишончи ортиб бораётганидан далолат бериши» ва «танланган йўлнинг тўғрилигини кўрсатиши»ни қайд этди.

«Давлат раҳбарининг саъй-ҳаракатлари туфайли мамлакатимиз хорижий инвесторлар учун янада жозибадор бўлди, бу эса иқтисодий ўсишга хизмат қилмоқда ва фуқароларнинг ҳаёт сифати яхшиланишига бевосита таъсир кўрсатмоқда», — деб ёзди у.

Ўзбекистонда ислоҳотларга содиқлик сақланиб қолса, S&P кредит рейтингини ошириши мумкин. Мисол тариқасида агентлик энергия тарифларини либераллаштириш ва давлат корхоналари устидан назоратни яхшилашни таъкидлайди. Рейтингни яхшилашнинг яна бир омили — иқтисодий кўрсаткичларни сезиларли даражада ёмонлаштирмасдан буджет тақчиллиги ва жорий операциялар ҳисобини камайтириш.

Бундан ташқари, агар ташқи ва буджет тақчиллиги ноқулайроқ савдо шароитлари, барқарор юқори давлат харажатлари ёки давлат қарзини жалб қилишнинг юқори нархи натижасида бироз пасайса, прогноз «барқарор»га ёмонлашиши мумкин. Қарз маблағлари ҳисобидан молиялаштириладиган инвестиция лойиҳаларининг паст самараси туфайли иқтисодий ўсишнинг секинлашиши ҳам салбий омил ҳисобланади.