Ўзбекистонда янги автомобиллар учун божхона тўловларини ҳисоблаш тартиби ўзгартирилди
Ишлаб чиқарилганига 1 ва 3 йилдан ошмаган автомобиллар учун алоҳида импорт божи белгиланади. Автомобиль эҳтиёт қисмлари учун ҳам икки хил бож ставкаси ўрнатилган.
Президент томонидан қабул қилинган қарор билан ташқи иқтисодий фаолият товар номенклатураси кодларининг рўйхати тасдиқланиб, импорт божхона божи ставкаларига тегишли ўзгартиришлар киритилди.
Унда ташқи иқтисодий фаолият товар номенклатураси кодларини Жаҳон божхона ташкилоти ва ЖСТ қоидалари асосида юритиш, импорт божлари ва TIF TN кодларини ягона ҳужжат асосида тизимлаштириш асосий мақсад этиб белгиланган. 2027 йилдан Товарларни тавсифлаш ва кодлашнинг уйғунлаштирилган тизимига ўзгартириш ва қўшимчалар киритилиши ҳисобига TIF TN бож тарифи билан биргаликда юритилади.
Божхона қўмитаси матбуот котиби Ҳусан Тангриевнинг маълум қилишича, қарор билан автотранспорт воситалари ва уларнинг эҳтиёт қисмлари учун импорт божларини қўллаш тартибига ўзгартиришлар киритилди.
Хусусан, божларнинг турлича қўлланилишини бартараф этиш мақсадида TIF TNнинг 87 (автотранспорт воситалари ва уларнинг эҳтиёт қисмлари) гуруҳидаги подсубпозициялар рақамлари ўзгартирилиб, ишлаб чиқарилганига 3 йилгача бўлган янги автомобиллар учун икки хил импорт божи ўрнатилди. Амалда бу битта кодда таснифланарди.
Бунда ишлаб чиқарилганига 1 йилдан ошмаган янги автотранспорт воситалари учун алоҳида, 3 йилгача бўлган автомобиллар учун алоҳида божхона божи ставкалари белгиланади.
Шунингдек, автомобиль эҳтиёт қисмларига ҳам икки хил импорт божи ставкаси ўрнатилган: янгилари учун 5%, олдин фойдаланилганлари учун эса 15%. Бироқ улар ҳам битта TIF TN кодда таснифланади.
Божхона қўмитаси автотранспорт воситаларининг эҳтиёт ва бутловчи қисмлари янги ёки ишлатилганлигини аниқловчи тартиб мавжуд эмаслигини қайд этди. Шундан келиб чиқиб, 3 ой муддатда унинг мезони ва тартибини назарда тутувчи норматив-ҳуқуқий ҳужжат лойиҳаси ишлаб чиқилади.
МДҲнинг ягона TIF TN кодлари тўғрисидаги келишувига асосан, 9 хоналик TIF TN кодлари асосида миллий бозордаги товарлар хусусиятидан келиб чиқиб, Ўзбекистонда 10 хоналик TIF TN жорий этилди.
Бундан ташқари, ташқи иқтисодий фаолият товар номенклатураси биринчи маротаба ўзбек тилида эълон қилинди. Ҳужжат 1 июндан бошлаб кучга киради.
