Ўзбекистонда жисмоний шахсларга маблағларни бир банк ҳисобидан бошқасига тўғридан-тўғри ўтказиш имконини берувчи Account-to-Account (A-A) пул ўтказмаларининг янги формати ишга туширилди. Бу ҳақда Марказий банк матбуот хизмати хабар қилди.

Қайд этилишича, ушбу сервис президентнинг 2025 йил 10 декабрдаги фармони ижроси доирасида жорий этилмоқда ҳамда рақамли молиявий технологияларни ривожлантириш ва фойдаланувчилар учун имкониятларни кенгайтиришга қаратилган.

Account-to-Account тизими турли банклар мижозларининг ҳисобварақлари ўртасида тўғридан-тўғри ўтказмаларни таъминлайди. Банк карталари рақамларидан фойдаланиладиган оммавий P2P ўтказмаларидан фарқли ўлароқ, янги формат операцияларни бевосита банк ҳисобварақлари орқали амалга оширишни назарда тутади.

Банк картаси расмийлаштирилаётганда, у айнан шу картага боғланган банк ҳисобварағи асосида очилади.

«Бу бошқа карта эмас ва алоҳида янги карта очиш талаб этилмайди. Бу — мавжуд банк иловангизда танланадиган ўтказма усули бўлиб, пул ўтказишда хизмат турини танлаш орқали амалга оширилади. Бу — пул ўтказишнинг янги усулидир», — дейилади хабарда.

Сервис ишлаши учун зарур бўлган техник инфратузилма Марказий банкнинг Ахборотлаштириш бош маркази томонидан яратилди.

Регулятор маълумотларига кўра, бугунги кунда сервис барча банкларда техник жиҳатдан жорий этилган. Шу билан бирга, амалдаги ўтказма усуллари, жумладан, P2P сақланиб қолади, A-A эса қўшимча имконият ҳисобланади.

Сервисдан фойдаланганлик учун комиссия тўловларини банклар ўз тариф сиёсати доирасида мустақил равишда белгилайди. Уларнинг миқдори банкка ва хизмат турига қараб фарқ қилиши мумкин.

Марказий банк бозор иқтисодиёти шароитида регулятор комиссияларни белгилаш жараёнига аралашмаслигини алоҳида таъкидлади. Шунингдек, тарифларни шакллантиришда Ахборотлаштириш бош маркази ҳам иштирок этмайди, чунки у тўлов хизматларини кўрсатмайди ва мижозлар билан бевосита алоқа қилмайди.

Фойдаланувчиларга пул ўтказишнинг энг қулай усулини танлаш учун банкларнинг шартлари ва комиссиялари билан олдиндан танишиб чиқиш тавсия этилади.