2025 йил январь—сентябрь ойларида Ўзбекистонда микромолия хизматларига талаб кескин ошди. Тўққиз ой давомида кредит ташкилотлари жами 104 трлн сўмлик микроқарз ва микрокредит ажратган. Марказий банк таҳлилига кўра, бу кўрсаткич 2024 йил мос даврига нисбатан 1,8 баравар кўп.

Микромолия кредитларининг катта қисмини (82 фоиз) микроқарзлар ташкил этмоқда. Хусусан, учта чоракда аҳоли 83 трлн сўмлик микроқарз олган. Тадбиркорлар эса 21 трлн сўмлик микрокредит жалб қилган. Қарзларнинг 99,5 фоизи миллий валютада берилган. Микромолия кредитларининг умумий кредитлар таркибидаги улуши 34,2 фоизга етган (бир йилда 7 фоиз ўсиш).

Ҳисоб-китобларга қараганда, аҳолига берилган микроқарзлар миқдори тўққиз ойда 40,7 трлн сўмга ошган. Бу бир йил аввалги миқдордан икки баравар юқори. Микрокредитлар ҳам ўтган йилга нисбатан 6 трлн сўмга, яъни 40 фоизга кўп ажратилган.

Микромолия хизматларининг 68,4 трлн сўми банклар томонидан кўрсатилган. Шундан 49,4 трлн сўм хусусий банклар ҳиссасига тўғри келади. Қолган қарзлар микромолия ташкилотлари ва ломбардлар орқали берилган.

Ҳудудлар кесимида Тошкент шаҳри энг юқори кўрсаткични қайд этди. Пойтахтда тўққиз ойда 66,2 трлн сўмлик микромолия хизматлари кўрсатилган. Бу 2024 йил мос даврига нисбатан 37,2 трлн сўмга ёки 2,3 баробарга кўп. Кредитларнинг 57,6 трлн сўми аҳолига берилган микроқарзларни ташкил қилган.

Энг паст кўрсаткич Сирдарё вилоятида қайд этилган — ҳудудда жами 1,1 трлн сўм микроқарз ва микрокредит ажратилган. Шундан 700 млрд сўми микроқарзлар ҳиссаси га тўғри келган.