Охирги уч йилда муомаладаги банк пластик карталари сони икки баравар ўсди. Ўрнатилган тўлов терминаллари камайган, банкоматлар эса кўпайиб бормоқда.

Жорий йил 1 октябрь ҳолатига кўра, Ўзбекистонда муомалага чиқарилган банк пластик карталари сони 63,64 миллион донага етди. 2022 йил мос даврида бу кўрсаткич 31,8 миллионта эди. Яъни уч йилда муомаладаги карталар икки баравар кўпайган. Таққослаш учун, 2023 йил октябрда аҳоли фойдаланётган карталар 41,3 миллион дона, 2024 йил шу даврида 53,6 миллионта бўлган.

Октябрь ойи бошида мамлакатда ўрнатилган жами тўлов терминаллари сони 430,2 мингтани ташкил этди. Бу бир йил аввалгидан 6 мингта, икки йил олдингидан 900 та кўп. Бироқ уч йил илгари, яъни 2022 йил 1 октябрда терминаллар сони 432,2 мингта бўлган. 2021 йил октябрда эса бунданда кўпроқ —435 минга яқин эди. Охирги йилларда тўлов терминаллари сони камайиб бораётганини кўриш мумкин. Бироқ терминаллар орқали амалга оширилган тўловлар суммаси ортган. Масалан, жорий йил бошидан октябргача мазкур ускуналарда жами 318,2 трлн сўмлик тўловлар қилинган. Таққослаш учун, 2024 йил мос даврида бу рақам 237,5 трлн сўм эди. 2023 йил мос даврида эса бундан сезиларли кам — 181,5 трлн сўм бўлган.

Охирги уч йилда республикада ўрнатилган банкомат ва инфокиосклар сони икки баравар кўпайган. Улар сони 2022 йил 1 октябрда 19,3 мингта бўлса, 2025 йил октярга келиб 38,1 мингтага етган.