Ўзбекистон автоимпортининг 71 фоизини электромобиллар эгаллади
2025 йилда олиб кирилган қарийб 80 мингта автомобилнинг 56 мингтадан ортиғи электромобиллар бўлди, бензинли машиналар импорти эса 40 фоизга камайди.
Бундан бир йил аввал кузатилган тенденция — электромобиллар ва гибрид автомобиллар импорти илк бор бензинли автомобиллар импортидан ошиб кетиши 2025 йилда нафақат сақланиб қолди, балки сезиларли даражада ошди.
| 2025 йил учун кўрсаткич | Электромобиллар | Бензинли автомобиллар | Гибридлар |
| Миқдори (дона) | 56 832 | 19 871 | 3,017 |
| Йил учун динамика | +140% | -40% | -82,7% |
| Импорт улуши | 71,2% | 24,9% | 3,8% |
| Импорт миқдори (млн доллар ) | 701 | 388 | 80.9 |
| Ўртача нарх ($) | 12 335 | 19 500 | 26 800 |
Ўтган йил якунларига кўра, Ўзбекистонга 79 822 та автомобиль импорт қилинди. Бу 2024 йилдаги кўрсаткичга (74 505 та) нисбатан 7,1 фоизга кўп. Шу билан бирга, етказиб бериш ҳажми пул қийматида (долларда) 8 фоизга — 1,28 млрд доллардан 1,17 млрд долларгача камайди.
Жами импортнинг 56 832 таси электромобиллар ҳиссасига тўғри келди. Уларнинг хариди қарийб 2,4 бараварга ошди. Электромобиллар жами автомобиль импортининг 71,2 фоизини эгаллади, ваҳоланки, бир йил аввал бу кўрсаткич 32,3 фоиз эди.
Ўтган йили 19 871 та бензинли автомобиль олиб кирилди, бу 2024 йилга нисбатан деярли 40 фоизга кам. Уларнинг импортдаги улуши 44,2 фоиздан 24,9 фоизгача қисқарди.
Гибрид автомобиллар импорти 5,8 бараварга — 17 480 тадан 3017 тагача тушиб кетди, уларнинг бозордаги улуши эса 23,5 фоиздан 3,8 фоизгача камайди.
Дизелли машиналар етказиб бериш ҳажми 4,6 бараварга ошди — 22 тадан 102 тага етди.
Қиймат жиҳатидан электр транспорт воситалари импорти 3,1 бараварга, 224,7 млн доллардан 701 млн долларгача (барча импорт қилинган транспорт воситалари қийматининг 60 фоизи) ошди. Битта электромобилнинг ўртача нархи 32,2 фоизга ошиб, 9328 доллардан 12 335 долларга кўтарилди
Бироқ декабрь ойи маълумотларига қаралса, импорт қилинган битта электромобиль нархи 17 600 доллардан ошган (бир йил олдин бу кўрсаткич қарийб 5100 доллар эди).
Бу 1 майдан бошлаб электромобиллар учун утилизация йиғимининг 2,3−4 бараварга оширилиши билан боғлиқ.
Бензинли машиналар етказиб бериш ҳажми 706,8 млн доллардан 388 млн долларгача (-45%) камайди. Ички ёнув двигателли битта автомобилнинг ўртача нархи 9 фоизга пасайиб, 21,5 минг доллардан 19,5 минг долларга тушди.
Гибрид автомобиллар хариди 4,2 бараварга — 339,3 млн доллардан 80,9 млн долларгача қисқарди. Аммо бундай автомобилнинг ўртача нархи 38 фоизга ошиб, 19,4 минг доллардан 26,8 минг долларга етди.
Декабрь ойида импорт ҳажми кескин ошди
Айниқса, декабрь ойида жуда сезиларли ўсиш кузатилди. Йилнинг сўнгги ойида мамлакатга умумий қиймати 51,7 млн доллар бўлган 2887 та автомобиль олиб кирилди, бу ноябрь ойидаги кўрсаткичлардан қарийб икки баравар кўп. Молиячи Отабек Бакировнинг ёзишича, бу двигатель ҳажми 1 ва 1,2 литр бўлган кичик ҳажмли автомобиллар учун божхона тўловларининг кескин ошиши кутилгани билан боғлиқ бўлиши мумкин, шу сабабли импортчилар етказиб беришни тезлаштирган бўлишлари эҳтимол.
Унинг сўзларига кўра, амалдаги утилизация йиғими миқдорлари жисмоний шахслар ва кичик бизнес учун арзон электромобилларни олиб киришни унчалик фойдали қилмай қўйган, яъни йиғим ставкаси машина нархининг 50 фоизидан ошиб кетиши мумкин. Натижада бозор асосан ўзига тўқ харидорлар имконияти етадиган қимматроқ моделлар томонга силжимоқда.
