Ўзбекистонда банклар ва нобанк молия ташкилотларига нисбатан санкциялар қўллаш тартиби янгиланади. Марказий банк бошқарувининг қарори билан Банклар ва нобанк кредит ташкилотларига нисбатан чоралар ва санкциялар қўллаш тартиби тўғрисидаги низомга ўзгартириш ва қўшимчалар киритилди. Мазкур низом билан микромолия банклари, кафолатлар берувчи ташкилотлар, факторинг ташкилотлари ва кредит бюроларига нисбатан ҳам чора ва санкциялар қўллаш тартиблари белгиланди.

Асосий ўзгаришлардан бири — регулятор томонидан қўлланадиган чора ва жарималар рўйхати кенгайтирилди ҳамда миқдорлари капиталига нисбатан фоиз ҳисобида белгиланмоқда.

Хусусан, истеъмолчиларга ахборотлар ва шартномалар, шу жумладан, расмий веб сайти орқали берилиши лозим бўлган маълумотлар давлат тилида тақдим этилмаганда банкдан ҳар бир ҳолат учун 10 млн сўм миқдорида жарима, микромолия ташкилотидан ҳар бир ҳолат учун 5 млн сўм миқдорида жарима, ломбарддан ҳар бир ҳолат учун 3 млн сўм миқдорида жаримага сабаб бўлади.

Банк, микромолия ташкилоти ва ломбард томонидан жисмоний шахснинг илгари олган кредитлари (микроқарзлари) бўйича муддати ўтган қарздорлиги мавжуд бўлган тақдирда унга кредит (микроқарз) берилиши:

• банкдан ҳар бир ҳолат учун 7,5 млн сўм, бунда ҳолат 100 тадан ортиқ бўлса, банк жами капиталининг 0,01 фоизи, бироқ 750 млн сўмдан кам бўлмаган миқдорда жарима;
• микромолия ташкилотидан ҳар бир ҳолат учун 4 млн сўм, бунда ҳолат 100 тадан ортиқ бўлса, микромолия ташкилоти жами капиталининг 0,2 фоизи, бироқ 100 млн сўмдан кам бўлмаган миқдорда жарима;
• ломбарддан ҳар бир ҳолат учун 1,5 млн сўм, бунда ҳолат 100 тадан ортиқ бўлса, ломбард жами капиталининг 0,2 фоизи, бироқ 50 млн сўмдан кам бўлмаган миқдорда жарима солишга сабаб бўлади.

Муддати ўтган қарздорлик юзага келганда банклар, микромолия ташкилотлари ва ломбардлар томонидан истеъмолчилар билан ўзаро муносабатларни амалга оширишда қонунчилик талабларига риоя қилинмаганда:

• банкдан ҳар бир ҳолат учун 3 млн сўм, бунда ҳолат 100 тадан ортиқ бўлса, банк жами капиталининг 0,01 фоизи, бироқ 300 млн сўмдан кам бўлмаган миқдорда жарима;
• микромолия ташкилотидан ҳар бир ҳолат учун 1,5 млн сўм, бунда ҳолат 100 тадан ортиқ бўлса, микромолия ташкилоти жами капиталининг 0,2 фоизи, бироқ 100 млн сўмдан кам бўлмаган миқдорда жарима;
• ломбарддан ҳар бир ҳолат учун 750 минг сўм, бунда ҳолат 100 тадан ортиқ бўлса, ломбард жами капиталининг 0,2 фоизи, бироқ 50 млн сўмдан кам бўлмаган миқдорда жарима қўллашга олиб келади.

Кредит, микроқарз ва кредит карта бўйича шартномаларда назарда тутилган тўловлардан ортиқча тўловлар (маблағлар) ҳисобланганда:

• микромолия ташкилотидан ҳар бир ҳолат учун 1,5 млн сўм, бунда ҳолат 100 тадан ортиқ бўлса, микромолия ташкилоти жами капиталининг 0,2 фоизи, бироқ 100 млн сўмдан кам бўлмаган миқдорда жарима;
• ломбарддан ҳар бир ҳолат учун 750 минг сўм, бунда ҳолат 100 тадан ортиқ бўлса, ломбард жами капиталининг 0,2 фоизи, бироқ 50 млн сўмдан кам бўлмаган миқдорда жарима солишга сабаб бўлади.

Мазкур ўзгаришлар 2026 йил 7 августдан кучга киради.