2026 йил июнь ойида Ўзбекистондаги автомобиль ёқилғи қуйиш шохобчаларида жами 3,6 трлн сўмлик савдо тушумлари қайд этилди. Марказий банк маълумотларига кўра, ой давомида АЁҚШларда кунлик тушумлар ўртача 119,3 млрд сўмни ташкил қилган. Кунлар кесимида тушумларда айрим тебранишлар кузатилган бўлсада, умумий динамика барқарор сақланиб қолган.

2026 йил 1 апрелдан бошлаб автомобилларга ёқилғи қуйиш шохобчаларида нефть-газ маҳсулотларини сотиш ва электромобилларни зарядлаш хизматлари учун тўловлар фақат банк карталари ёки электрон тўлов тизимлари орқали амалга оширилиши белгиланган. Ушбу тартиб президентнинг «Нақдсиз ҳисоб-китобларни оммалаштириш ва яширин иқтисодиёт улушини қисқартиришга қаратилган қўшимча чора-тадбирлар тўғрисида»ги фармонида кўзда тутилган.

Июнь ойидаги жами 3,6 трлн сўмлик тушум 30 кунга тақсимланганда, АЁҚШларда ҳар куни ўртача 119,3 млрд сўмлик савдо амалга оширилган. Таққослаш учун, май ойида АЁҚШларда кунлик тушумлар ўртача 107,3 млрд сўм атрофида шакллангани хабар қилинганди.

Шу асосда июнь ойидаги ўртача кунлик тушум май ойига нисбатан тахминан 11,2 фоизга ошган. Бу ўсиш бир неча омил билан изоҳланиши мумкин: ёз мавсумида автомобилда ҳаракатланиш фаоллигининг ортиши, ёқилғига талабнинг мавсумий кўпайиши, шунингдек, 1 апрелдан кейин тўловларнинг электрон шаклга ўтказилиши натижасида тушумларнинг расмий тизимларда тўлиқроқ акс этиши.

Июнь ойида АЁҚШларда жами 19 миллион 947 минг 386 та транзакция амалга оширилган. Бу бир кунда ўртача 664 минг 913 та транзакция қайд этилганини англатади.

Июнь ойида нақдсиз тўловлар таркибида асосий улуш мавжуд банк карталари ҳиссасига тўғри келган. Марказий банк маълумотларига кўра, кунлик ўртача тушумнинг:

• 90,3 фоизи, яъни 107,7 млрд сўми мавжуд банк карталари орқали;
• 6,4 фоизи, яъни 7,6 млрд сўми момент карталари орқали;
• 3,3 фоизи, яъни 3,9 млрд сўми ёқилғи карталари орқали амалга оширилган.