Тошкент шаҳар ҳокими ўринбосари Шароф Раҳмонов 21 октябрь куни AKS Service Group компанияснинг бош ижрочи директори Ваис Каис билан учрашди. Бу ҳақда пойтахт ҳокимлиги матбуот хизмати хабар берди.

Маълум қилинишича, Ваис Каис қишлоқ хўжалиги маҳсулотларини Британия бозорида тарғиб қилиш соҳасида консалтинг хизматларини кўрсатувчи AKS Service Group фаолияти ҳақида маълумот берган. Компания Ўзбекистондан Буюк Британияга гилос экспорт қилиш, шунингдек инвестиция лойиҳаларини ишлаб чиқиш, ҳуқуқий экспертизадан ўтказиш ва кузатиб бориш билан шуғулланади.

«Биз Ўзбекистон бозоридаги иштирокимизни кенгайтириб, Тошкентда ваколатхона очиш ва турли инвестицион лойиҳаларда иштирок этиш ниятидамиз», — дея таклиф билдирди Ваис Каис.

Хабарга кўра, Шароф Раҳмонов компания раҳбариятининг Ўзбекистон бозоридаги иштирокини кенгайтириш борасидаги истагини қўллаб-қувватлаган. Ҳоким ўринбосари қишлоқ хўжалиги маҳсулотларини етказиб бериш, ташиш ва логистика хизматларини кўрсатиш бўйича маҳаллий ҳамкорлар билан шерикликни йўлга қўйиш таклифини билдирган.

Ҳамкорлик йўналишларини танлаш учун Шароф Раҳмонов шаҳарда мавжуд эскирган инфратузилмани янгилаш, Cushman & Wakefield компаниясининг тавсияларига кўра, шаҳар муҳитини қайта ташкил этиш, ижтимоий ташаббуслар ва бошқа лойиҳаларни амалга ошириш каби таклиф ҳамда вазифалар рўйхатини тақдим этган. Томонлар ҳамкорлик йўналишларига ойдинлик киритиш учун алоқани давом эттиришга келишиб олгани маълум қилинди.

Аввалроқ Ўзбекистоннинг тарихий шаҳарлари марказларида Duty Free дўконлари ташкил этилиши ҳақида хабар берилганди.