Европа инвестицион банки Қорақалпоғистонга 35 миллион евро кредит ва грант маблағларини ажратиш бўйича музокаралар олиб борилмоқда. Бу ҳақда АОКАда ўтказилган Сенатнинг Оролбўйи минтақасини ривожлантириш масалалари қўмитаси раиси Борий Алихонов ва Ўрмон хўжалиги илмий-тадқиқот институти директори Абдушукур Ҳамзаев иштирокидаги матбуот анжуманида маълум қилинди.

Қайд этилишича, Орол денгизи хавзаси жанубидаги ерларни тиклаш бўйича техник иқтисодий асос лойиҳаси тайёрланган. Ушбу лойиҳани амалга ошириш учун Европа инвестицион банкидан Коракалпоғистон учун 35 миллион евро кредит ва грант маблағларини ажратиш бўйича музокаралар олиб борилмоқда. Ушбу лойиҳа доирасида Қоракалпоғистонда 17,5 минг гектар деградацияга учраган ерларни қайта тиклаш назарда тутилган.

Таъкидланишича, Орол қутқариш халқаро жамғармаси (МФСА) Нукус филиали Қўнғирот давлат ўрмон ов хўжалиги билан тузилган шартномага асосан «Оққум» худудида дарахт ва бута кўчатларини ўтказиш бўйича жами 4 миллиард 8 миллион 887 минг 263 сўмлик, шу жумладан 2021 йилда 453 миллион 590 минг сўмлик иш бажаришга қўшимча келишув имзоланган.

Шунингдек, Нукус филиали Мўйноқ давлат ўрмон хўжалиги билан 2010 йил 13 октябрда тузилган шартномага асосан «Ахантай» худудида дарахт ва бута кўчатларини ўтказиш бўйича жами 2 миллирад 327 миллион 499 минг 363 сўмлик, шу жумладан 2021 йилда 447 миллион 250 минг сўмлик иш бажаришга қўшимча келишув имзоланган.

Аввалроқ Халқаро тикланиш ва тараққиёт банки Ўзбекистон қишлоқ хўжалигига 19,5 миллион евро ажратиши ҳақида хабар берилганди.