Uber Eats Канаданинг Онтарио штатидаги мижозларга марихуана етказиб беришни бошлайди. Бу ҳақда BBC нашри хабар бермоқда.

Маълум қилинишича, илова фойдаланувчилардан ёшини тасдиқлашни талаб қилади. Мижозлар Tokyo Smoke чакана сотувчисидан Uber Eats’нинг махсус бўлимида маҳсулотни танлаши, сўнг уни яқин атрофдаги дўкондан олиши мумкин бўлади.

Ушбу маҳсулотларни етказиб бериш буюртма тўланганидан кейин бир соат ичида амалга ошиши мумкин. Uber’нинг қайд этишича, компаниянинг Tokyo Smoke билан ҳамкорлиги катта харидорларга хавфсиз ва қонуний наша сотиб олишга ёрдам беради, бу эса ноқонуний савдони камайтиради.

Канададаги марихуана бозори йилига 4 миллиард долларга баҳоланади. Мамлакатда каннабис 2018 йилгача тақиқланган эди. Маҳсулот дам олиш мақсадида фойдаланиш учун қонунийлаштирилганига қарамай, норасмий чакана сотувчилар ҳали ҳам савдонинг катта улушига эга.

Tokyo Smoke — Канадада марихуана сотадиган компания. BDS Analytics прогнозига кўра, ушбу маҳсулот савдоси 2026 йилга келиб 6,7 миллиард долларгача ошади.

Аввалроқ Uber ишга туширилганидан бери илк марта операцион даромадини ошкор қилгани ҳақида хабар берилганди.