Россия ва Ўзбекистон келгусида товар айирбошлаш ҳажмини 2020 йилдаги 5,9 миллиард доллардан 10 миллиард долларга ошириши мумкин. Бу ҳақда Россия бош вазири ўринбосари Виктория Абрамченко таъкидлади.

«Россия Ўзбекистоннинг етакчи савдо ҳамкорларидан бири — ташқи савдо айланмаси бўйича иккинчи ўринда. 2020 йил якунига кўра товар айирбошлаш ҳажми 15 фоиздан ортиқ ўсиб, 5,9 миллиард долларни ташкил этди. Бизнинг мақсадимиз бу кўрсаткични 10 миллиард долларга етказишдир», — дейди Абрамченко.

Бош вазир ўринбосари стратегик шериклик ва иттифоқчиликка асосланган Россия-Ўзбекистон муносабатлари жадал ривожланаётганини таъкидлаган. Ҳукуматлараро яқин ҳамкорлик йўлга қўйилган. Ҳукумат раҳбарлари даражасида икки томонлама савдо-иқтисодий, инновацион, технологик ва сармоявий ҳамкорликни йўлга қўйиш саъй-ҳаракатларини мувофиқлаштириш бўйича Қўшма комиссия тузилган.

Абрамченко, шунингдек, мамлакатлар 2022-2026 йилларга мўлжалланган кенг қамровли ҳамкорлик дастурини тайёрлагани, саноатнинг кенг доираси бўйича лойиҳалар рўйхати янгиланганини маълум қилган. Саноат ва транспорт, қишлоқ хўжалиги, ёқилғи-энергетика, таълим ва фан, миграция ва бошқа соҳаларда ҳамкорликни янада ривожлантириш бўйича келишувларга эришилган. Бош вазир ўринбосари Ўзбекистон қишлоқ хўжалиги маҳсулотлари россияликлар яхши кўрадиган ўзига хос бренд эканини, бироқ уларнинг Россия бозоридаги улуши ҳали етарлича юқори эмаслигини қайд этган.

Унинг қўшимча қилишича, Ўзбекистондан келаётган қишлоқ хўжалиги маҳсулотлари Россиянинг барча қишлоқ хўжалиги маҳсулотлари импортининг атиги 1,1 фоизини, МДҲ давлатларидан импортнинг 5 фоизини ташкил этади. Бош вазир ўринбосарининг сўзларига кўра, ҳамкорликни ривожлантириш учун салоҳият мавжуд.

Аввалроқ Шавкат Мирзиёев Владимир Путин билан учрашганда икки мамлакатнинг ўзаро товар айирбошлаши 2021 йил охиригача 7 миллиард долларга етиши ҳақида таъкидлаганди.