Алишер Усмоновнинг компанияси «Лебединский» комбинатининг собиқ акциядорларини шантажда айблади
Акциядорлар «Металлоинвест» раҳбариятининг комбинат акцияларини ноқонуний сотиб олганини даъво қилди.
Алишер Усмоновнинг «Металлоинвест» компанияси «Лебединский» кон-қайта бойитиш комбинати собиқ миноритар акциядорларини шантажда айблади. Бу бўйича компаниялар қўшма баёнот эълон қилди.
Миллиардер Алишер Усмоновга тегишли «Металлоинвест» компанияси «Лебединский» кон-қайта бойитиш комбинати («Лебединский» ГОК)нинг собиқ миноритар акциядорларини шантажда айблаган. Собиқ комбинат акциядорлари 2007 йилда ҳолдинг уларнинг акцияларини ноқонуний сотиб олган деб ҳисобламоқда.
Компанияларнинг фикрича, бир гуруҳ собиқ миноритар акциядорлар «Металлоинвест» раҳбариятини бойиб кетиш истагида комбинат акцияларини ноқонуний сотиб олганликда айблаган. Баёнотда айтилишича, «Газметалл» (ҳозирги «Металлоинвест») акцияларни миноритар акциядорлардан мустақил баҳоловчи томонидан белгиланган нархдан деярли 50 фоизга қимматроқ нархда сотиб олган ва Россиянинг барча инстанция судлари сотиб олиш тартибининг қонунийлигини тасдиқлаган.
Бунадн олдин собиқ миноритар акциядорлар «Металлоинвест» устидан ЕИ мамлакатлари ҳуқуқ-тартибот идораларига шикоят аризаларини юбориб, уларда «Лебединский» ГОК трансферт нархлари схемасидан фойдалангани ва ўзининг реал даромадини оффшор компанияларда яширганини даъво қилган.
Собиқ миноритар акциядорлар 2007 йилда Усмоновнинг оффшор компаниялари (BGMT и FMC) 3 миллиард доллар даромадини эълон қилганини, ГОКнинг расмий даромади эса 1 миллиард доллардан кам бўлганини таъкидлаган.
«Металлоинвест», ўз навбатида, BGMT’нинг ҳолдингга ҳеч қандай алоқаси йўқлигини ва FMC даромади бир нечта заводлар — «Лебединский» ва «Михайловский» комбинатлари, «Оскол» электрометаллургия заводи ва «Уральская сталь» экспорти ҳисобига 7 фоиз даражасидаги бозор учун нормал савдо маржасига эга эканини қайд этган.
Шунингдек, 2007 йилда «Лебединский» комбинатининг 99,47 фоизига эгалик қилувчи «Газметалл» миноритар акциядорлардан ҳар бир акция учун 8015 рубль (тахминан 300 доллар) бўлган бозорга 30 фоиз устама билан мажбурий сотиб олиш таклифини киритган. Баҳолаш «Гориславцев и Ко. Оценка» томонидан амалга оширилган.
Натижада 11 мингга яқин миноритар акциядорлар 0,53 фоиз акция учун 30,7 миллион доллар олган. Олти ой ўтгач, темир рудаси 65 фоизга қимматлашган ва даъвогарлар томонидан ёлланган Белгород вилоят суд экспертизаси маркази акцияларнинг қийматини ҳар бир акция учун 23 минг 500 рублдан баҳолаган.
«Металлоинвест» директорлар кенгаши раиси, USM бош директори Иван Стрешинскийнинг сўзларига кўра, «Лебединский» комбинати нархи олти ой ичида ҳақиқатан ҳам ошган, аммо ўша вақт акциядорлар томонидан битим аллақачон ёпилган ва улар қўшимча тўловни талаб қилишга ҳақли бўлмай қолган. Шунингдек, бир йил аввал «Металлоинвест»нинг 20 миллиард доллар қийматидаги биржага кириш режалари маълум бўлгач, комбинатнинг собиқ акциядорлари яна фаоллашган.
Аввалроқ Алишер Усмонов фонди Тошкентнинг Эски шаҳарида арт-резиденциялар яратиши хабар қилинганди. Шунингдек, Алишер Усмоновга алоқадор компания «Капиталбанк»дан яна улуш сотиб олгани ҳақида хабар берилди.
