Apple янги iPhone’ни 7 сентябрь куни тақдим этиши мумкин
Apple 7 сентябрь куни iPhone 14 смартфонлари тўпламини тақдим этиши мумкин. Шунингдек, тақдимотд Mac компьютерларининг бир нечта моделлари, iPad ва Apple Watch’нинг учта модели намойиш этилади.
Apple 7 сентябрга режалаштирилган кузги тақдимотда янги iPhone 14 смартфонлари тўпламини тақдим этиши мумкин. Бу ҳақда Bloomberg манбаларга таяниб хабар бермоқда.
Қайд этилишича, тақдимотда Mac компьютерларининг бир нечта моделлари, iPad ва Apple Watch’нинг учта модели намойиш этилади.
Маълумотларга кўра, iPhone 14 базаси iPhone 13 га ўхшаш бўлади, компания 5,4 дюймли мини-версияни истисно қилиб, 6,7 дюймли экранли моделни қўшади.
Бундан ташқари, олд камера ўзгаради, бу эса экраннинг бир қисмини бўшатишга ёрдам беради.
iPhone 14 Pro янада кучли чипга эга бўлади, оддий iPhone 14 моделларида эса iPhone 13 даги А15 чиплари сақланиб қолади. Pro моделлари 48 мегапикселли кенг бурчакли камерага эга бўлади.
Таъкидланишича, янги маҳсулотлар сотуви сентябрь ойи ўрталарида бошланади. Баъзи чакана савдо дўконлари учун 16 сентябрдан сотувлар бошланиши эълон қилинди.
Apple матбуот хизмати тақдимот санасини маълум қилишдан бош тортди.
Аввалроқ Ҳафталик Power On ахборот бюллетени муаллифи, Bloomberg журналисти Марк Гурман Apple смартфонларининг янги авлодида пайдо бўладиган янгиликлар ҳақида маълумот берганди.
Шунингдек, Apple компания раҳбари Тим Кук иккинчи чоракда Iphone харидорлари сезиларли ўсганини маълум қилганди. Унинг айтишича, компаниянинг соф фойдаси 2022 йилнинг иккинчи чорагида 19,4 миллиард долларни ташкил этган.