Яна бир ҳафта (15–21 ноябрь) ўз якунига етиб бормоқда. Ушбу давр мобайнида Ўзбекистон ва жаҳон ахборот майдони қайноқ янгиликларга тўла бўлди. «Kommers.uz» улардан энг сараларини битта дайжестга тўплади.

2022 йил учун давлат бюджети лойиҳаси

Молия вазирлиги «2022 йил учун Ўзбекистон Республикасининг Давлат бюджети тўғрисида»ги қонун лойиҳасини эълон қилди. Маълум қилинишича, қонун лойиҳаси Ўзбекистон Бюджет кодексининг 83-моддасига мувофиқ ишлаб чиқилган. Унда Ўзбекистон номидан ва Ўзбекистоннинг кафолати остида олинадиган давлат қарзининг чекланган ҳажмлари белгиланган. Лойиҳа 17 та модда ва 10 та иловадан иборат.

Қонун лойиҳасида:

• 2022 йил учун асосий макроиқтисодий кўрсаткичлар прогнози;
• 2022 йил учун консолидациялашган давлат бюджети даромадлари ва харажатлари прогнози ҳамда 2023–2024 йиллар учун бюджет мўлжаллари;
• биринчи даражали бюджет маблағларини тақсимловчилар учун Ўзбекистон бюджетидан 2022 йилда ажратилаётган маблағларнинг чекланган миқдорлари;
• Қорақалпоғистон, вилоятлар ва Тошкент шаҳар маҳаллий бюджетларининг даромадлари ва харажатлари прогнозлари;
• Ўзбекистон бюджетидан маҳаллий бюджетларга ажратилаётган тартибга солувчи трансфертлар;
• давлат мақсадли жамғармалари, Тикланиш ва тараққиёт жамғармасининг 2022 йилги тушумлари ва харажатлари прогнозлари ҳамда 2023–2024 йиллар учун бюджет мўлжаллари белгилаб берилган.

Қайд этилишича, 2022 йил учун давлат бюджети лойиҳаси ва 2023–2024 йиллар учун бюджет мўлжаллари асосий макроиқтисодий кўрсаткичлар прогнози асосида ишлаб чиқилган.

Ўзбекистондаги ишсизлик

Ўзбекистонда 2021 йилнинг январь-сентябрь ойларида ишсизлик даражаси 9,4 фоизни ташкил этиб, 2020 йилнинг шу даврига нисбатан 1,7 фоизга, январь-июнь ойларига нисбатан 0,4 фоизга камайди.

Маълум қилинишича, 2021 йилнинг сентябрь ойида Бандлик ва меҳнат муносабатлари вазирлигининг Республика аҳоли бандлиги ва меҳнатни муҳофаза қилиш илмий маркази томонидан Ўзбекистоннинг 108 та шаҳар ва туманида навбатдаги ижтимоий сўров ўтказилган. Тадқиқот давомида 500 та ўзини-ўзи бошқариш органи, 5 мингта уй хўжаликлари ҳамда 26,5 минг нафар фуқаро қамраб олинган.

Қайд этилишича, 2021 йилнинг январь-сентябрь ойларида меҳнат ресурслари сони 19 миллион 322,8 минг кишини ташкил этиб, 2020 йилнинг шу даврига нисбатан 101,1 фоизга ёки 201,4 минг кишига ошган. Шунингдек, иқтисодиёт тармоқларида банд бўлганлар сони 13 миллион 609,1 минг кишини ташкил этиб, 2020 йилнинг мос даврига нисбатан 3,1 фоизга (403,9 минг кишига) ошган.

ҚҚС 12 фоизгача пасайтирилади, фақат 2023 йилдан

Ўзбекистонда 2023 йилдан қўшилган қиймат солиғи 12 фоизгача пасайтирилади. у ҳақда Молия вазирлиги томонидан тақдим этилган 2022 йилги бюджетномада сўз боради.

Қайд этилишича, 2023 йил 1 январдан бошлаб:

• қўшилган қиймат солиғи 15 фоиздан 12 фоизга;
• мобиль алоқа хизматларига акциз солиғи ставкаси 15 фоиздан 10 фоизга;
• банк, мобиль алоқа операторлари ва бозорлар ва савдо комплекслари учун белгиланган фойда солиғи ставкаси 20 фоиздан 15 фоизга пасайтирилади.

Бунда қатъий миқдорда белгиланган акциз, ер солиғи, мол-мулк, сув солиғи ставкалари инфляция даражасидан кам бўлмаган миқдорда индексацияси қилинади.

Эски «права»ни алмаштириш муддати узайтирилди

Ўзбекистонда эски ҳайдовчилик гувоҳномасини алмаштириш муддати 1 йилга узайтирилди. «Миллий ҳайдовчилик гувоҳномасининг ҳамда автомототранспорт воситаси рўйхатдан ўтказилганлиги тўғрисидаги гувоҳноманинг янги намуналарини жорий этиш чора-тадбирлари тўғрисида тўғрисида»ги ҳукумат қарорига ўзгартиришлар киритилди.

Эски ҳайдовчилик гувоҳномалари қуйидаги муддатларда янгисига мажбурий алмаштирилади:

• 2010 йилгача берилганлари — 2022 йил 31 мартгача;
• 2010–2012 йилларда берилганлари — 2022 йил 30 июнгача;
• 2013–2015 йилларда берилганлари — 2022 йил сентябргача;
• 2015 йилдан кейин берилганлари — 2022 йил 31 декабргача.

Илгари 2021 йил 31 декабргача алмаштириш мажбурий эди.

Тадбиркорликка тўсқинлик қилаётган муаммолар

Иқтисодий тадқиқотлар ва ислоҳотлар маркази томонидан ишбилармонлик муҳитини ўрганиш бўйича сўровнома ўтказилди. Ҳисоботда таъкидланишича, октябрь ойида товарлар/хизматларга бўлган талаб сўровномада иштирок этган 53 фоиз корхоналарда яхшиланиб, ходимлар сони эса 31 фоиз корхоналарда ошган.

Шу билан бирга, қуйидагилар тадбиркорликда тўсқинлик яратаётган муаммолар сифатида белгиланган:

• молиялаштириш ва ер участкалари;
• юқори солиқ ставкалари;
• пандемия таъсири;
• юқори нархлар;
• хомашёнинг етишмаслиги;
• товарлар/хизматларга бўлган талабнинг пастлиги.

Сотилаётган Матбуот уйи

Тошкент шаҳри Миробод туманида жойлашган Матбуот уйи сотувга қўйилди. Маълум қилинишича, инвестиция киритиш миқдори ихтиёрий бўлиб, талабгорларнинг хоҳишига қараб белгиланади. Бино-иншоотлар майдони 18 142 квадрат/метрни ташкил этади. Закалад пули таклиф этилаётган нархнинг камида 5 фоизи миқдорида этиб белгиланган.

Қайд этилишича, талабгорлардан келиб тушган таклифларни умумлаштирилган ҳолда кўриб чиқиш ва тегишли қарор қабул қилиш учун давлат мулкини сотишда тендер савдоларини ўтказиш бўйича давлат комиссиясига киритилади ҳамда мазкур комиссия қарорига асосан ғолиб аниқланади.

Экобошқармага Captiva «ҳадя қилган» Даврон Ҳидоятов

Даврон Ҳидоятовнинг Тошкент вилояти ҳокими сифатидаги сўнгги қарорларидан бири «Автотранспорт воситасини балансдан-балансга ўтказиш тўғрисида» бўлди.

Қарорга кўра, Тошкент вилояти ҳокимлиги балансидаги 2015 йилда ишлаб чиқарилган Captiva Тошкент вилояти Экология ва атроф муҳитни муҳофаза қилиш бошқармасига ўтказилди.

Шунингдек, қарорда Тошкент вилояти ҳокимлиги ишлар бошқармаси ўрнатилган тартибда автотранспорт воситасини топширилишини, Тошкент вилояти Экология ва атроф муҳитни муҳофаза қилиш бошқармаси қабул қилиб олиниши қайд этилган.

Мирзиёев ва Путин учрашуви

Шавкат Мирзиёев Россия Президенти Владимир Путиннинг таклифига биноан 19 ноябрь куни ташриф билан Россияга келди. Маълум қилинишича, олий даражадаги музокаралар Кремлда бўлиб ўтди. Ўзбекистон товар айирбошлаш ҳажмининг 18 фоизи Россияга тўғри келмоқда. Товар айирбошлаш кўпаймоқда: пандемияга қарамай, 2020 йили 15 фоиздан кўпроққа ошган.

«Шуни алоҳида таъкидлашни истардимки, кейинги йилларда муносабатларимизда чинакам улкан ютуқларга эришилди — бундай кўрсаткичлар илгари бўлмаган. Сиз айтганингиздек, товар айирбошлаш ортмоқда: тўққиз ой якунида беш миллиардни ташкил этди, йил охирида етти миллиард бўлади. Муносабатларимизда бундай рақам илгари кузатилмаган», — дейди Шавкат Мирзиёев.

Қайд этилишича, 2020 йилда ўзаро савдо ҳажми 5,6 миллиард доллардан ошган бўлса, 2021 йилнинг 10 ойида ушбу кўрсаткич 6 миллиарда етиб, йил якунига қадар 7 миллиард долларга яқинлашиши кутилмоқда.

Музокаралар якунида Президентлар Халқаро ахборот хавфсизлигини таъминлаш соҳасида ҳамкорлик тўғрисида қўшма баёнот қабул қилди. Ташриф доирасида жами 18 та икки томонлама ҳужжат имзоланди.

Чирчиққа кўчаётган заводлар

«Тошкент қишлоқ хўжалиги техника заводи», «Агрегат заводи», «Технолог», «Технолог-Стан», «Агросаноатмашинвест» корхоналари ишлаб чиқариш қувватларининг бир қисмини Чирчиқ шаҳридаги «Чирчиқ қишлоқ хўжалиги техникаси заводи» ҳудудига кўчириш ҳамда корхоналарни қайта ташкил этиш масалалари уларнинг акциядорлари умумий йиғилиши томонидан дастлабки тарзда кўриб чиқилган ва тегишли қарорлар қабул қилинган. Шунингдек, корхоналар негизида қишлоқ хўжалиги машинасозлик кластери ташкил қилинади.

Бундан ташқари, «Тошкент трактор заводи» масъулияти чекланган жамияти («ТТЗ» МЧЖ) ташкил этилади. «Чирчиқ қишлоқ хўжалиги техникаси заводи» ҳамда юқорида айтиб ўтилган корхоналарнинг устав капиталларидаги давлат улушлари номинал қийматда ушбу корхонага ўтказилади. «ТТЗ» МЧЖдаги давлат улуши «Ўзавтосаноат»га 2 йил муддатга ишончли бошқарувга берилади.

Бензин нархи атрофидаги гаплар

Сўнгги кунларда Ўзбекистонда бензин нархи кескин кўтарилиши жамоатчилик муҳокамаларига сабаб бўлмоқда. Аввалроқ Ўзбекистонда АИ-80 бензинининг бошланғич нархи 70 фоиз кўтарилгани маълум қилинди. Шундан сўнг Монополияга қарши курашиш қўмитаси раиси ўринбосари Фаррух Қорабоев бензин нархи 10–15 кун ичида ўзгаришини айтди.

Кейинчалик Ўзбекистонда биржа савдоларида Аи-80 маркали автомобиль бензини нархи 8 фоизга арзонлашди. «Ўзбекнефтгаз» департамент директори Хушнуджон Маҳмудов АОКАда ўтказилган матбуот анжуманида Ўзбекистонда Аи-80 маркали бензиндан воз кечилишини маълум қилди. Шунингдек, 20 ноябрь куни Ўзбекистон республика товар-хом ашё биржасида Аи-80 маркали бензин нархи 9,5 фоизга арзонлашгани ҳақида хабар берилди.