Яхта бозорида 2021 йил 262 та люкс маҳсулот умумий қиймати 4,06 миллиард еврога сотилиб, 2020 йилга нисбатан деярли икки бараварга ошди. Бу ҳақда яхталар бозорини таҳлил қилувчи The Superyacht Agency тадқиқотига таяниб Forbes хабар берди.

Маълум қилинишича, 2021 йил сўнгги йилларда яхта қурувчилар ва брокерлар учун энг муваффақиятли бўлган. Сотилган қайиқлар сони кўп йиллик максимал даражага етган ва уларнинг умумий қиймати 2020 йилдаги кўрсаткичдан деярли икки баравар ошган.

Мутахассисларнинг фикрига кўра, 2021 йил савдолар сони бўйича ҳам, уларнинг умумий қиймати бўйича ҳам узоқ муддатли максимал қийматни кўрсатган. 2020 йилга нисбатан сотувлар 46 тага ошган. Таҳлилчилар буни 2021 йили ковидга қарши чекловлар унчалик қаттиқ бўлмагани билан боғламоқда.

Қайд этилишича, тўртинчи чорак сотувлар бўйича энг муваффақиятли бўлган, ўшанда 78 та яхта сотилган. Энг самарали ой эса июнь ойи бўлиб, брокерлар умумий қиймати 456 миллион евро бўлган 26 та суперяхтани сотишга муваффақ бўлган.

Тадқиқотда, биринчи навбатда, сотиш умумий қийматининг ошиши қайд этилган. Агар 2021 йилда «фақат» 46 тага кўп яхта сотилган бўлса, транзакцияларнинг умумий қиймати 2,27 миллиард евродан 4,06 миллиард еврогача — деярли икки баравар кўпайган.

Шунингдек, 2020 йилда сотишнинг арзонлиги COVID-19 нинг пайдо бўлиши ва ундан келиб чиқадиган ноаниқлик билан боғлиқ. 2021 йилда яхтанинг нархи ўртача 15,6 миллион еврони ташкил этган, бир йил аввал эса 10,5 миллион евро эди.

«COVID-19 энди яхта нархига таъсир қилмаяпти, энди сиз ажойиб суперяхтани арзонга сотиб ололмайсиз», — дея таъкидлайди Burgess бош директори Жонатан Беккет.

Яхталар бозори мутахассислари 2022 йилда сотувлар кучли бўлишини кутмоқда. Бироқ, улар энг кўп талабга эга ўлчамлар ва брендлар орасида сифатли таклифлар йўқлиги сабабли яхта нархининг эҳтимолий ўзгариши ҳақида огоҳлантирмоқда.

Хабарга кўра, 2021 йилда сотилган энг қиммат яхталар орасида Microsoft асосчиси Жоди Алленнинг 126 метрли Octopus яхтаси ҳам бор. Қайиқнинг сўнгги нархи 235 миллион еврони ташкил қилган. Америкалик режиссёр Стивен Спилбергнинг 86 метрли Man of Steel яхтаси деярли икки баравар арзонга сотилган.

Аллен яхтани канадалик пўлат қуйиш соҳаси миллиардери Барри Зекельманга 131 миллион еврога сотган. Россиялик миллиардер Роман Абрамович 2021 йил бошида 145 метрли Solaris’ни олган, яхта бизнесменга 250—300 миллион еврога тушган бўлиши мумкин.

Аввалроқ 2021 йилда сотилган 10 та энг қиммат супер яхта ҳақида хабар берилганди.