Франциянинг дунёдаги тенгсизликни ўрганувчи World Inequality Lab тадқиқот ташкилоти 2022 йилги World Inequality Report («Жаҳон тенгсизлик ҳисоботи»)ни эълон қилди.

Ҳисоботда қайд этилишича, пандемия мулкий тенгсизликни сезиларли даражада ошириб юборган. 2750га яқин миллиардер бутун дунё бойликларининг 3,5 фоизини назорат қилади, 1995 йилда эса бу улуш атиги 1 фоизни ташкил этган.

Тадқиқотга кўра, пандемия даврида глобал бойлик тенгсизлиги рекорд даражада ўсган. Ер юзидаги барча камбағалларга тегишли мулкнинг ярими дунёдаги энг бой одамлар мулкининг атиги 2 фоизига тенг.

Даромадлар тенгсизлигининг энг юқори даражаси Яқин Шарқ ва Шимолий Африкада қайд этилган, бу ерда аҳолининг энг бой 10 фоизи минтақа умумий даромадининг деярли 60 фоизига эгалик қилади. Кейинги ўринларда Саҳрои Кабирдан жануброқдаги Африка (57 фоиз), Лотин Америкаси (55 фоиз) ҳамда Жанубий ва Жануби-Шарқий Осиё (53 фоиз) қайд этилган.

Россия ва Марказий Осиё мамлакатларида фуқароларнинг энг бадавлат 10 фоизи жами даромаднинг 48 фоизига, Шимолий Америкада эса 45 фоизига эгалик қилади. Мулкий тенгсизлик Европада энг кам қайд этилган — аҳолининг энг бадавлат 10 фоизи умумий даромаднинг 36 фоизига эгалик қилади.

Аввалроқ Forbes дунёнинг энг нуфузли аёллари рейтингини эълон қилгани ҳақида хабар берилганди.