«Фольксваген Груп Рус» компанияси Ўзбекистонда электромобиль ишлаб чиқариш ривожланишига қизиқиш билдирди. Бу ҳақда Энергетика вазирлиги матбуот хизмати хабар берди.

Маълум қилинишича, 2022 йилнинг 7 февраль куни Ўзбекистон Энергетика вазири Алишер Султонов Тошкент шаҳрида «Фольксваген Груп Рус» компанияси бош директори Штефан Меха бошчилигидаги делегация аъзолари билан музокаралар ўтказган.

Ўзбекистонда электромобиллар ишлаб чиқариш каби йўналишнинг ривожланиши «Фольксваген Груп Рус» компаниясида катта қизиқиш уйғотган. Ўзбекистонда электромобиллар олиб киришда акциз солиғи ва божхона тўловлари олинмайди. Бир қатор ёқилғи қуйиш шохобчалари негизида электромобилларга ёқилғи қуйиш шохобчалари фаолият кўрсатмоқда ва бу йўналишда хусусий тадбиркорлик субъектлари ривожланиб бораётгани қайд этилган.

Хорижий делегация аъзолари Ўзбекистонда 2030 йилга бориб умумий энергетика балансидаги улуши камида 25 фоизни ташкил этиши режалаштирилган қайта тикланувчи энергия манбалари(ҚТЭМ)ни ривожлантириш бўйича олиб борилаётган ишлар билан ҳам танишган. Бу йўналишда 2021 йилда 100 мегаватт қувватга эга биринчи қуёш фотоэлектр станцияси ишга туширилган, иккинчиси эса 2022 йилнинг март ойида фойдаланишга топширилиши кутилмоқда.

Шунингдек, 2024 йилда умумий қуввати 2,2 гигаватт бўлган қайта тикланувчи энергия манбалари объектларини, шунингдек, қуввати 326 мегаватт бўлган ГЭСларни ишга тушириш режалаштирилган.

Учрашувда томонлар қўшма лойиҳаларни амалга ошириш имкониятлари юзасидан фикр алмашган ҳамда истиқболли таклифларни батафсил кўриб чиқишга келишиб олган.

Аввалроқ Самарқандда Volkswagen ва Skoda дилерлик марказлари очилгани хабар қилинганди. Шунингдек, Шавкат Мирзиёев GTL Uzbekistan заводи бўйича фикр билдиргани ҳақида хабар берилди.