Geely автомобиль бренди Ўзбекистон бозорига кирмоқчи
Хитойнинг энг йирик автомобиль компанияларидан бири Geely 2023 йил Ўзбекистонда фаолиятини бошламоқчи. Кенг ассортиментдаги моделлар, жумладан, электромобиллар маҳаллий харидорларга тақдим этилади
Хитойнинг энг йирик автомобиль компанияларидан бири Geely 2023 йил Ўзбекистонда фаолиятини бошламоқчи. Компания матбуот хизматининг хабар беришича, кенг ассортиментдаги моделлар, жумладан, электромобиллар маҳаллий харидорларга тақдим этилади.
Маълум қилинишича, айнан аккумуляторли автомобиль бозорга биринчи бўлиб киради. Гап Geometry C электр хэтчбеки ҳақида кетмоқда. Ушбу модель 204 от кучига эга двигатель билан жиҳозланган бўлиб, қувват захираси 550 километрни ташкил этади. Моделнинг меню мультимедиа тизими рус ва инглиз тилларида амалга оширилади.
«Ишончимиз комилки, харидорлар Geely компаниясининг янги маҳсулотларини, хусусан, Geometry C электромобилини юқори баҳолайди. Ушбу модель замонавий дизайн, юқори рақобатбардош устунликлари билан бир қаторда ҳамёнбоп нархни ўзида мужассам этган», — деди Asaka Motors International дистрибюторлик компанияси тижорат директори Саиджон Турсунов.
Қайд этилишича, 2023 йил Geely брендининг барча автомобиллар ассортименти мижозларга тақдим этилади. Улар орасида Geely Coolray, Geely Monjaro, Geely Tugella, Geely Okavango, Geely Emgrand, шунингдек, Geely Geometriya E ва Geely Geomery C электромобиллари ҳам бор.